Director di DAS Glenda Hernandez:
ORANJESTAD (AAN) — Glenda Hernandez, director di Departamento di Asunto Social (DAS), ta haya cu nos comunidad a yega na un punto positivo, door di papia tocante e casonan di abuso di mucha, ya cu esaki tabata un tema cu no tabata bin dilanti asina aki.
Sra. Hernandez a expresa cu esaki ta un desaroyo positivo pasobra antes esaki tabata keda scondi, pero aworaki e victimanan ta hayando un cara.
E cifra cu DAS a menciona algun siman pasa, cu tin entre 4 pa 7 caso di abuso di mucha pa siman, e ta reitera cu awor ta hayando cara, y e ta contento cu tin cierto mayornan y ta bay hospital y ta zorg pa haya e “red kid” cu si e mucha ta haya un daño fisico, e ta wordo investiga.
Sra. Hernandez a indica tambe cu 90 porciento di e casonan no tin ningun evidencia. E hecho cu nos ta biba den un Estado di Derecho kiermen cu pa por persigui un hende mester tin evidencia, pero si 90% di e casonan no tine, no tin caso.
E muchanan mester conta na cas y mayornan mester puntra nan yiunan con a bay cu e dia, con a bay na scol, kico a bay bon, kico a bay menos bon, no obstante e mayor ta cansa, e tin cu haci e preguntanan aki.
Ora e mucha ta custumbra cu mayornan ta haci nan e preguntanan aki, esaki ta crea un lazo di confianza cu e mucha por papia.
Sra. Hernandez a subraya cu hopi biaha e mucha ta papia demasiado laat. Ora cu e ta laat ta despues di 72 ora cu tur evidencia riba abuso sexual a bay.
Pa loke ta maltrato fisico cu tin biaha ta hopi grandi, e casonan ta yega hospital, unda nan ta saca por ehemplo, foto. Pero si e mayornan no ta denuncia e violencia, e causante no ta bay dilanti Corte.
El a subraya cu deber di mayornan ta cuida y proteha e yiunan y si nan no ta hacie gobierno, e momento ey, ta interveni.
