Home Enseñanza Sosten total pa MAVO atardi pa desaroyo di un grupo mas grandi

Sosten total pa MAVO atardi pa desaroyo di un grupo mas grandi

6
0
SHARE
- Advertisement -

Analisis

Recientemente DIARIO publica informacionnan riba e impacto di nivel abou di enseñanza den un comunidad. Cifranan di instancianan oficial a indica con henter comunidad ta sufri ora e porcentahe di personanan cu a sigui enseñanza mas avansa, baha.

Mientras DIARIO lo continua cu resultadonan di su investigacion, e hecho cu ta introduci un MAVO atardi ta soluciona un di e problemanan basico cu a wordo señala dor di expertonan den diferente rapport.

MAVO atardi, sigur ora e sistema digital hunga un papel mas importante, lo haci enseñanza posibel pa gruponan cu debi na varios factor no por a sigui school despues di e parti basico.

Tin hopi motibo segun expertonan pakico un hoben no ta bay school avansa. Uno di nan ta, e falta di entrada y necesidad pa yudansa financiero di famia. Condicionnan familiar financiero ta hunga un papel pero tambe e actitud di duna menos importancia na educacion den un mundo cu ta exigi mas profesionalismo

E problema ta keda cu unabes interumpi e proceso educacional, e hoben tin tendencia di sigui riba e curso di poco desaroyo y hopi talento ta bay perdi.

Un problema cu Aruba conoce y cu na Hulanda ta menos, ta e hecho cu un hoben ta studia y traha. E sistema di school te awor no ta duna mucho espacio na hobennan cu ta traha pero tambe kier sigui nan estudio.

MAVO ta un estudio cu ta duna entrada na hopi posibilidad den bida y hopi bes e hoben cu ta traha ta den necesidad di orario diferente di school.

Hopi bes na e luga di empleo di un hoben, portanan ta habri pa desaroyo y posicionnan mas halto ora e hoben dicidi pa traha y studia.

Un cantidad di curso ta exigi mas cu school basico como base inicial. MAVO ta un exigencia minimo pa cantidad di curso importante.

Te awor a papia di hoben. MAVO atardi ta habri un porta pa e grupo cu no ta hoben mas pero kier subi nan nivel di enseñanza. Ta dificil pa e grupo aki pasobra nan no por bolbe school debi na nan edad.

Educacion y capacitacion ta sumamente importante pa e diversificacion di nos economia pasobra cada rato ramonan nobo di empleo ta habri mientras ciencia ta avansa.

E introduccion di MAVO atardi sigur tin apoyo di DIARIO, cu ta kere cu educacion ta necesario pa desaroyo y elevacion di e ser humano y su participacion activo den comunidad.

- Advertisement -

DUNA COMENTARIO

Please enter your comment!
Please enter your name here