Home Hudicial Stranhero ta ‘set up’ pa kita Arubiano for di trabou

Stranhero ta ‘set up’ pa kita Arubiano for di trabou

730
0
SHARE
- Advertisement -

Yiu di tera ta basha abao den Corte

ORANJESTAD  (AAN) – Un homber Arubiano T. ayera mainta den Corte a conta Hues con un stranhero a set e up, pa asina kit’e for di trabou mientras cu e mesun stranhero y otronan, cu ta haciendo cos for di sla, si ta keda traha.

E homber aki, ora el a bay reclama e stranhero, e stranhero a bisa cu e no a haci nada. Ora e homber a confronta e stranhero cu e hefe di trabou a bis’e cu e stranhero a saca potret y manda pa director di e compania, e stranhero a bay asina leu di insulta e Arubiano. Ta logico cu na Aruba, ningun Arubiano NO TA ACEPTA un hende, y mucho menos un stranhero, insulta bo mama. El a bay pa dal e homber stranhero. E homber stranhero a core bay y el a tir’e cu piedra pero ningun no a dal’e. E stranhero tin e curashi riba dje di bay haci denuncia na Polis contra e Arubiano, cu el a kita su pan di cada dia. Awor e homber ta haya condena pasobra el a bira victima di set up di un stranhero.

DIARIO ta haya e caso aki hopi importante pasobra ya ta di dos caso cu a cubri den Corte caminda stranhero ta set up otro pa kita for di trabou. Ta incomprendibel cu na Aruba esaki ta tumando lugar. Tin companianan na Aruba caminda ta acepta e stranhero mas liher cu e Arubiano.

Con por ta posibel cu e tipo di abuso aki ta sosode bou di nos nanishi y nada no ta wordo haci. Ta di aplaudi cu Warda Nos Costa ta haciendo esfuerzo pa saca esnan ilegal riba nos isla. Comunidad mester para y denuncia tur esnan cu ta yuda e ilegalnan riba nos isla. Pero awor mester tin un instancia cu ta sali na vanguardia di e abusonan aki.

SET UP DI STRANHERO

Fiscal a acusa e homber T. cu riba 24 Mei 2018, el a tira piedra den direccion di e homber G. E homber G. a haci denuncia di menaza.

T.a bisa Hues cu e asunto no ta manera G. ta bisa. El a bisa Hues cu el a bay traha via un “uitzend bureau” pa un compania como chofer di truck. Na e compania tin varios chofer di truck stranhero y como chofer di truck nan trabou tabata pa dump resto di material di construccion. Hopi biaha ta santo. T. a bisa cu el a wordo mustra door di e stranheronan cu envez di bay dump e tera, por bende esaki cu hende y ta haya algun cen. T. tambe a cuminsa haci esaki.

Riba un dia, el a bisa su hefe cu e ta bay basha e santo banda di trabou, caminda e trucknan tin cu pasa. El a haya aprobacion di su hefe. El a bay basha e santo y G. a bay saca potret y manda esaki pa e director. E hefe a yama T. y bis’e cu G. a manda e potret pa director y door di esey, e no por haci nada otro cu mester kita T.

T. a bisa e director cu tur e otro chofernan tambe ta haci asina y hasta a mustra prueba. E director a keda cu su decision. T. a bisa Hues cu e ta haya inhusto cu e ta wordo kita y tur e stranheronan cu ta haci mesun cos, si a sigui traha. El a bisa cu via e oficina cu el a haya e trabao e no por busca abogado pa bringa p’e.

T. a dicidi di bay papia cu G. manera homber grandi y a reclama G., pakico el a haci e cos ey y pone perde su trabou cu e mester pa mantene su famia. G. a kende a nenga y ora T. a bis’e cu e hefe mes a bis’e cu ta G., G. a insult’e. Segun T. e kier a dal G. pero G. a core bay na pia y a cay. T. a coy un piedra y tira riba G., pero a faya. G. a sigui core y bolbe cay.

T. a bay cas, en espera di Polis. Despues di 6 luna Polis ta bay serca dje pa interog’e. Hues a bisa cu un testigo a bisa cu el a mira T. coy piedranan y tira pero e piedranan no a dal G. Hues a puntra T. awor cu e ta mira kico a pasa, kico e ta pensa di su accion. Segun T. e no a actua corecto pero G. a perhudik’e pa mantene su famia. T. a bisa Hues cu el a arepenti di loke el a haci. El a bisa Hues cu te ainda e, como Arubiano riba su pais, no tin trabou pero e extranheronan si. Awor T. ta biba di subsidio. El a remarca cu tur e otro chofernan cu ta hacienda e cos ey, a keda traha. E no ta haya husto cu e so ta wordo perhudica siendo cu tur e otro chofernan ta haci asina.

EXIGENCIA FISCAL

Fiscal a bisa cu por compronde cu T. ta bisa cu e tabata haci loke tur e otronan tabata haci y ta lamenta cu el a wordo kita y otronan no. Fiscal a bisa cu e no ta kere cu T. a bay papia sino a bay pa tira piedra. Na Polis el a bisa cu el a tira piedra. E testigo tambe a bisa cu T. a tira piedra. E hecho cu e piedranan no a dal G., esey no ta kita afor cu e tabata un menaza. Fiscal a bisa cu e ta compronde e situacion di T. cu el a wordo kita pero no ta tene cuenta cu esey den castigo. Fiscal ta haya un castigo di trabou pa comunidad lo ta na su lugar. El a exigi 60 ora di trabou di cual 30 ora ta condicional cu un tempo di prueba di 2 aña.

SENTENCIA

Hues a sera tratamento di e caso y a dicta sentencia di biaha. Hues ta haya T. culpable di menaza G. door di tir’e cu piedra. E piedranan no a dal G. y pesey ta menaza. Hues a bisa cu T. a admiti y a bisa cu e ta arepenti loke a pasa. Hues a mustra cu e tiramento di piedra por tabatin consecuencia hopi serio si a dal G. Hues ta haya e exigencia di Fiscal na su lugar y a confirma esaki. Hues a condena T. na 60 ora di trabou pa comunidad, di cual 30 ora ta condicional cu un tempo di prueba di 2 aña.

- Advertisement -

DUNA COMENTARIO

Please enter your comment!
Please enter your name here