Home Actividad Especial Tienda di Educacion a lanza videonan educativo ariba YouTube pa yuda mayornan...

Tienda di Educacion a lanza videonan educativo ariba YouTube pa yuda mayornan durante proceso di separacion

94
0
SHARE
- Advertisement -

Cifranan di divorcio ta halto na Aruba

ORANJESTAD (AAN):  Coordinador di Tienda di Educacion, Corina Linssen a duna di conoce cu dia 15 di Mei ta Dia Internacional di Famia Nucleo y den cuadro di esaki nan a yama un conferencia di prensa pa pone enfasis ariba e importancia cu cada mucha tin derecho na un famia, un hogar unda e por biba feliz y contento.

Ta conoci cu e realidad no ta tur ora mescos y no tur mucha tin e chens pa biba den un famia feliz. Hopi cos ta influencia e bida di un famia manera pleitamento entre mama y tata y nan ta dicidi di separa for di otro. Esaki mas cu claro ta influencia e bida di un mucha y por influencia su desaroyo tambe, Linssen a indica.

Na Aruba e cifranan di separacion ta halto. Na 2015, 52% di hende cu ta casa cu otro a dicidi di separa. Hopi mucha ta pasa den un situacion di separacion di no solamente parehanan cu ta casa cu otro pero di esunnan cu ta biba cu otro como pareha y haya yiu, a indica.

Basta mucha no ta biba bao di un dak hunto cu nan mama y tata. Pesey Tienda di Educacion a haya hopi importante pa trece esaki dilanti.

Tim mucha cu ta sinti culpabel cu nan mama y tata no ta biba mas cu otro. Nan ta sinti tristeza pasobra nan tin cu reparti nan pertenencianan entre e cas di mama y esun di e tata. Tambe nan kier yama un di e mayornan ora cu nan ta na e cas di e otro mayor, pero e mayor ta bisa no.

Tienda di Educacion a pensa cu mester haci algo cu esey. Nan ta duna sosten na e mayornan pa medio di e fundacion (ora di yama 161).  E separacion ta trece hopi emocion fuerte y hopi frustracion.

Eynan kier trece mas sosten yudanza. Pa logra esey, Corina Linssen a indica, y nan a lanza un YouTube Channel unda mayor y comunidad di Aruba por wak 6 video actualmente.

Den e videonan ta bisa con e mayor por deal cu cada fase cu ta bin dilanti den un proceso di separacion. Por ehempel, e luto. Con e mayor por anda cu e fase aki sin lubida cu e mucha tambe ta pasa den dje.

Ariba e video por haya tips pa yuda e mayor y pa yuda e yiu.

Den otro video ta ilustra “Bo rol como ex pareha y bo rol como mayor. Esey ta trece un cambio grandi”, a expresa.

A indica cu e videonan ta disponible 24 ora pa dia y 7 dia pa siman ariba YouTube pa medio di e canal:  Tienda di Educacion Aruba

E 6 videonan a wordo produci door di Paula Nahr di Nahr Media, specialista den documentarionan y mercadeo social,  cu e direccion actoral di Gloria Bryce y e participacion di e Furan y Egon Gonzalez, cu a ilustra cada situacion cu e muchanan ta experiencia durante e proceso di separacion.

Un invitacion special na comunidad henter pa wak videonan, entrante awe diaranzon, ariba e YouTube Channel: Tienda di Educacion Aruba. Pa mas informacion y tips tambe por yama 161 of bishita nan Facebook Page: Tienda di Educacion.

- Advertisement -

DUNA COMENTARIO

Please enter your comment!
Please enter your name here