Home Parlamento Tres aña pasa el a vota contra proyecto Citgo debi cu el...

Tres aña pasa el a vota contra proyecto Citgo debi cu el a haye dudoso y sin transparencia

61
0
SHARE
- Advertisement -

Parlamentario drs. Marisol Lopez-Tromp:

ORANJESTAD (AAN) – Den entrevista cu DIARIO, drs. Marisol Lopez-Tromp a elabora tocante Citgo Aruba, y el a relata pakico el a vota contra e apertura di e refineria tres aña pasa.

E tempo ey tabata net un aña prome cu eleccion, y Parlamentario Lopez-Tromp tabata Presidente di Staten.

Na e momentonan ey, tabata tin problemanan financiero cu gobierno tabata enfrentando, entre otro, buraconan den e begroting. Tambe e tempo ey Gobierno di AVP tabata dirigi su mes riba un “maneho green”, Aruba sostenible y tur otro tipo di proyecto pa bin cu un pilar economico nobo, di cual nunca lo por a spera cu ta bay tin un reapertura di e refineria, cu no a cuadra cu  e pensamento ey.

Lopez-Tromp a indica cu no obstante e proyecto di Refineria a haya su bida y tur hende por corda con intransparente y dudoso e proyecto aki tabata ora cu el a yega Parlamento.

El a subraya cu ni e documentonan relaciona cu e refineria ex-minister de Meza kier a entrega Parlamento.

E como Presidente di Staten e tempo ey a manda gobierno un carta despues cu el a mira den television cu nan a bisa cu nan a cera e deal, para dilanti e refineria cu bolo den man, pero Parlamento mes no tabata sa di nada.

E ta corda con ex-minister de Meza a contesta bisando cu e no ta haya oportuno ainda pa entrega e documentonan na Parlamento, considerando cu ainda nan tabata den un proceso di negociacion cu Valero y e kier a warda te ora cu esey caba, anto el a pensa cu esey por a trece un efecto riba e onderhandeling cu nan tabata tin.

E parlamentario a señala cu esaki mester tabata al contrario, pasobra Parlamento ta esun cu mester sa ora cu ta bay tin un acuerdo di e envergadura aki.

El a splica cu el a vota contra pasobra p’e mes tabata un deal no transparente, y na momento cu nan a bay benta e documentonan na Biblioteca y bisa parlamento cu nan por bay pasa riba un documento di dos mil pagina, lihe lihe.

Tambe drs. Lopez-Tromp ta corda con e situacion na Venezuela tabata for di e momento ey caba, no solamente cu e tabata empeorando sino cu tin di esnan cu tabata directamente envolvi den e proyecto aki, awe nan ta cera.

Parlamentario Lopez-Tromp a expresa cu e refineria tabata tin su bon tempo na Aruba, y el a nifica  hopi pa Aruba tempo di Lago, etc., pero awo a bin un temporada cu mester wak dilanti kico mas por haci na Aruba, considerando cu e pais ta chikito, teniendo cuenta cu su medio ambiente,  cu e salud di e poblacion, pasobra no ta secreto cu e refineria a afecta salud di varios persona, adulto y mucha, por ehemplo ora cu e huma a bira.

E parlamentario a comenta cu e tempo ey el a haci un pregunta e minister di salud e momento ey dr. Schwengle, cu ademas ta docter di pulmon, y el a confirma cu e por trece problema di salud, pero cu un cantidad di Parlamentario a vota pro considerando cu e lo trece cuponan di trabao pa Aruba, y mester stimula e economia. E ora ey nan ta bay den hopi profundidad den e aspecto economico, y a sostene e proyecto aki, maske cu nan no a wak e documentonan manera mester ta.

- Advertisement -

DUNA COMENTARIO

Please enter your comment!
Please enter your name here