ORANJESTAD (AAN): Ta casi tur luna bo por topa cu e situacion aki riba Green Corridor. E caminda nobo cu tin entre Oranjestad y San Nicolas.
Specialmente unda cu tin dos via, nan ta cera por lo menos 1x pa luna, e caminda asina aki, pa asina nan por ‘haci limpi y kita santo’ cu a plama for di riba e center strook di e caminda.
E parti central ta consisti di santo riba cual a planta cadushi y aloe. Pero e santonan aki hopi biaha ta plama door di biento y yobida y bay riba caminda.
Y chauffeurnan ta notando cu un biaha pa luna, ta cera mitar di e via pa asina haci esaki limpi.
“Esey nifica, cu pa 18 aña largo cu ta bin, cada luna nan lo bay cera e caminda pa haci esaki?” Esey tabata pregunta di un chauffeur cu no por kere esey.
A paga asina hopi placa pa e proyecto aki, pero e midden-berm mes a keda cu un problema cu cada biaha santo ta plama y bay riba caminda. Pues como cu e contratista di e proyecto financia via PPP aki ta responsable pa mantenimento pa e 18 añanan venidero, pues ta tur luna lo bo haya nan ta cera e caminda parcialmente djis pa kita santo for di riba asfalt.
