Ryan Maduro, Director Colegio EPI:
ORANJESTAD (AAN) – Director di Colegio EPI, Ryan Maduro, a hiba palabra den conferencia di prensa di gobierno, den cual su persona, Minister di Enseñanza y Vicepresidente di Instituto ALHEI, a firma un MOU.
Sr. Ryan Maduro a expresa cu enberdad esaki ta un oportunidad increible cu for di hopi aña caba a traha pa logra. El a comenta cu na 2015, Colegio EPI, atravez di su Unidad di Hospitalidad y Turismo, a firma un acuerdo di partnership cu American Hotel and Layer Education Institute, cual ta duna EPI e posibilidad di ofrece un portfolio y un sin fin di programa, certificacion y upgrading pa e industria di turismo di Aruba.
Sr. Ryan Maduro a señala cu considerando e compromiso cu manera Minister Lampe a indica, cu nos pan di cada dia, cual ta nutri nos cu ta e pilar di nos economia, ta hopi importante pa solidifica tur e acuerdonan y haci esaki bira e programa principal di educacion y recapacitacion di tur esnan cu ta traha den sector turismo.
Maduro a subraya cu e bunita di e programa aki ta cu e no solamente ta duna acceso na nivel nacional, pa training y capacitacion, pero tambe e ta duna Aruba e oportunidad como pais, pa bira un di e promenan den nos region cu ta eleva e standard nacional na nivel di servicio.
Esaki ta importante den e acuerdo aki cu a keda firma, y e ta contento cu tin tur e partnernan cu tin e compromiso manera Minister di Turismo, ATA y AHATA cu tur ta bay forma parti acuerdo aki y bisa cu aunke nos pais ta bon, ainda por ta miho.
“Nos tin cu corda cu nos tin cu proteha locual cu nos tin, y sigui eleva nos producto”, sr. Ryan Maduro a acentua. “Esaki ta e compromiso di Colegio EPI y nos ta contento cu awe nos ta culmina esaki”, el a agrega.
