Home General Acuerdo ilegal cu Citgo introduci den ambiente criminal

Acuerdo ilegal cu Citgo introduci den ambiente criminal

163
0
SHARE
- Advertisement -

Acuerdo a hinca Aruba den un crisis legal cu resultado grave

*Detencion grupo Martinez ta basa riba conflicto interes personal

*Aprobacion di Parlamento no tabata basa riba reglanan di ley

ORANJESTAD  (AAN) — Algo sumamente serio a pasa na Aruba, na momento cu e acuerdo Citgo a wordo negocia y introduci como e salbacion di e pais. Manera ya na un ocasion DIARIO a trece dilanti, e cuadro di ley di Aruba a wordo kibra manera pruebanan a demostra.

Mientras te ainda e acuerdo ta vigente y ta sigui hinca e pais den problema serio diariamente, informantenan cu a yuda DIARIO informa Aruba corectamente, ta di opinion cu no por laga tempo pone pueblo lubida kico a pasa cu introduccion di e acuerdo y pakico mester bini investigacion local.

“Un wega politico a wordo hunga cu Aruba cu tabata den necesidad grandi di un pilar economico nobo. Tur gremio na Aruba tabata consciente, cu e situacion economico di Aruba tabata sumamente malo mescos cu e situacion financiero. Turismo tabata cay dor di e problemanan na Venezuela. Ta increibel cu den e situacion cu tabata tin, gobierno di Aruba a bay negocia cu Nicolas Maduro un acuerdo cu awe tin Aruba lomba contra muraya,” un informante a mustra.

Na e momento cu a bay atende refineria cu Citgo, ya e reputacion di regimen Maduro tabata na suela. Tabata conoci cu Venezuela tabata den problema serio, cu sancion di Merca pa su relacionnan cu paisnan hasta terorista mientras su economia tabata den problema serio.

Informacionnan di DIARIO ta confirma cu e tempo Citgo no tabata tin ni cifra di e compania pa discuti pero si tabata conoci cu e negoshi tabata wordo uza como baca di lechi di regimen Maduro.

Awe DIARIO ta bolbe presenta pruebanan cu e acuerdo a wordo introduci na Aruba na forma ilegal. Den un situacion di riesgo halto na nivel economico cu peliger financiero pa Aruba, a bay negocia den un ambiente di criminalidad cu ya tabata existi na Citgo y tabata conoci rond mundo.

Gobierno Mike Eman a actua contra ley y no tabata tin derecho di mara Aruba na e contracto, cu Parlamento no tabata conoce ni a aproba. Gobierno Mike Eman no tabata tin derecho di actua cu secreto contra Parlamento di Aruba cu no mester a aproba e documento ya cu e no a haya oportunidad pa studia ni e documentonan, no consehonan, ni haci su investigacionnan riba Citgo y tur loke ta relaciona cu Citgo.

“E hecho cu e oposicion cu tabata minoria, cu excepcion di Marisol Lopez-Tromp, a aproba e documentonan di cual contra ley nan no tabata conoce e contenido y sin estudio di un situacion gubernamental dudoso di Maduro, ta contene un acto contra e base di nos leynan cu ta haci Parlamento responsabel pa e calidad di ley cu ta wordo introduci na Aruba na bienestar di Pueblo,” un experto a duna DIARIO di conoce.

Ta wordo spera cu no ta laga tempo bula pa e berdad di e proyecto muri pasobra awor Aruba ta haya tur prueba di e berdad di Citgo, cu a bira no solamente centro di corupcion y crimen.

“E partner di Aruba tabata regimen Nicolas Maduro y gobierno Mike Eman a percura pa e acuerdo keda secreto dor di crea den pueblo e ambiente politico cu oposicion tabata contra e acuerdo. Esaki a haci cu oposicion, cu riesgo di keda malo e prome momento enfrente pueblo, a bay di acuerdo pa aproba documento di cual e no a studia e contenido,” a wordo treci dilanti.

Segun informante, henter e proceso di negociacion y introduccion di Citgo tabata ilegal. violando leynan di Aruba, cu awe ta experencia e resultadonan cruel pa pueblo.

Mester bari e acuerdo for di mesa y cuminsa cu un investigacion den un tempo cu rond mundo ta lanta para contra corupcion y crimen di regimen Maduro cu a uza gobierno Mike Eman pa kibra e sistema legal cu ta proteccion di pueblo di Aruba.

“Un bes ta kibra ley. Si no tin investigacion y personanan responsabel no mester responde den un investigacion, Aruba ta bira un pais sin ley gubernamental loke ta nifica dictadura,” informantenan a mustra.

 

- Advertisement -

DUNA COMENTARIO

Please enter your comment!
Please enter your name here