ORANJESTAD (AAN) – Copa Noord a continua den un tanganaso entre e dos rivalnan Redskins y Royal Power Tat Fat Home Depot.
Den promer buelta di Copa Noord Redskins y Royal Power a midi forsa. Ambos equipo bon balansa cumpliendo cu e regla di pitcheo di e torneo esta “chata” a bataya durante 7 inning completo. Un wega cual a desaroya y a cana hopi liher.
Redskins ta tuma ventaha 1-0 den bom di promer inning. Den bom di 3 inning riba un bala cu rightfielder di Royal Power no por a bin cla cune Redskins ta rally pa amplia e score cu 2 careda mas hasiendo e wega 3-0.
Royal Power a keda purba bin bek den wega pero envano. Guyon Cannister ta habri cu triple pero ta perde pia den e proceso mei mei di short y tercera y ta bay tera y ta keda cortico.
Den cabes di 5 inning Franco Wouters ta dobla tercera bay home riba un hit pa center di Pilin pero riba un bon tiro di center Nathan Berkel y un bang bang play umpire ta decreta out y Royal Power un ves mas no a score.
Den bom di 5 Redskins ta piki un careda mas pa seya nan victoria y a cuminsa celebra. Boxscore final Redskins 4 careda, 7 hit, 2 error. Royal Power 0 careda, 7 hit, 1 error.
Redskins como equipo a bay di 24-7 pa un averahe di 293 mientras Royal Power a bati como equipo di 25-7 pa un averahe di 280. Redskins ta bati 7 fly mientras Royal Power a bati un total di 14 fly out cual tabata e dominio perfecto di atardi di Arjen Mathilda.
Arjen Mathilda a blankea Royal Power y por mira atras riba un tremendo actuacion. Tur hende a cuminsa busca den buki di historia ultimo biaha cu Royal Power a haya un blankeo den Copa Noord y no por a haya esaki y pues Arjen Mathilda a skirbi historia riba su nomber.
Alvaro Barrios el “caballo de hierro” tambe por mira atras riba un tremendo partido pues uno hopi balansa pero mester conforma su mes cu e derota.
Mihor bateadornan pa Redskins ta Norangelo Jacobus 3-2, Richinell Matos 1-1, Alfred Williams 2-1, Ray Bernabela 1-1 y Nathan Berkel di 3-1. Pa Royal Power a destaca na plato Gregory “Pilin” Krosendijk y Guyon Cannister di 2-1, Jomar Flanegin tabata redhot di 3-3, Giandrick Lacle y Franco Wouters ambos di 3-1.
Copa Noord drentando su recta final weekend binidero 22y 23 finalnan di Copa 40 y weekend di 29 y 30 di Juni weganan semi final y gran final. Cos a bira interesante!!
