Home Parlamento Arthur Dowers ta mira con Gobierno a aumenta debe pa yena Bestuurskantoor...

Arthur Dowers ta mira con Gobierno a aumenta debe pa yena Bestuurskantoor cu famia

47
0
SHARE
- Advertisement -

ORANJESTAD (AAN): Partido AVP den su conferencia di prensa semenal a conta cu Parlamentario mr. drs. Arthur Dowers, cu a cataloga e Gobierno aki como uno di medida. E famoso slogan di “Mega Debe” a muri na momento cu e Gobierno aki a aumenta e debe cu miyones extra cu te awe ta para ta paga interes sin cu e ta ser uza pa nada!

Unico cos cu e pueblo a mira te cu awo ta medida, cu esaki pueblo tin cu saca su conclusion cu e hendenan aki niun dia tabatin otro intencion, ni pa traha na fabor di pueblo. Nan kier a yega na poder pa nan por haci-deshaci y pa despues pasa pa historia. Ora a kere cu gañamento a caba y cu medida a caba, at’e siguiente medida a drenta bou nomber di “Grondbelasting”. Akinan e gobierno ta bay saca 16 miyon Florin for di saco di pueblo.

Arthur Dowers a sigui bisa, e gobernantenan aki tin curashi di bisa pueblo cu esaki no ta un medida riba nan! Si ta bay saca 16 miyon di e pueblo, pasobra grondbelasting ta tur hende cu tin tereno na e pais aki ta bay paga pe, anto no por bisa cu e pueblo no ta bay sinti’e.

E logica cu nan kier presenta, caminda nos tur a mira nan wega, baha grondbelasting di algun hende, mientras e PALO ta bin na momento cu na 2021 nan bay re-evalua tur e casnan aki y asina tur hende lo haya e sla cu nan no a spera. Esaki sigur ta algo cu nan no lo bay divulga prome cu eleccion, pasobra nan sa cu esaki lo ta un sla duro den nan contra, pero mas aun un sla duro riba e pueblo cu nan a gaña.

    Insolito ta e medida contra comercio:

Despues cu a bati tur comerciante cu medida, despues cu nan a pas’e pe pueblo y awo batinan cu e siguiente medida di grondbelasting, ta KEN ta esun cu bo ta kere ta bay pag’e?

Bo ta kere bo ta bay cobra e doño di negoshi 50 mil Florin na grondbelasting e aña aki, caminda e lo reparti e suma aki den tur producto y e pueblo cu bo a gaña cu e no ta bay paga grond belasting, ta hay’e ta pag’e den e kipashi cu e ta bay cumpra, den bleki di potted-meat, den e bleki di sausage, den e patia di casi 30 Florin na e momento aki, ey e ta bay paga pa e grond belasting cu bo a bati e comerciante cune. Na final di dia bo a tuma e pueblo haci.

Parlamentario Arthur Dowers ta puntra, si acaso Evelyn Wever Croes ta un politico cu tin caracter, e momento a yega pa e duna cuenta na pueblo y splica pueblo cu e no tabatin un idea kico e ta haci, cu e no tabata sa cu gobernacion tabata aisna complica, cu el a bay tira un para pasobra e kier a sinta den e stoel, el a mira un edificio cu yama Cocolishi nobo y bunita y kier a bay sinta den dje. Mientras prome cu esaki nan tabata esnan cu kier a bash’e abou y/o bend’e.

Te dia di awe cu nan ta sinta nan no por bin dilanti pa splica pueblo cu si tabata tin Mega debe nan a AUMENTA e Mega Debe enbes di baha esaki. Te cu awe, tras grito di mega debe, no por bin splica di con Banco Central a vocifera cu cifra actual di debe tabata hopi mas abou di locual nan a proclama.

Cu un cifra eroneo a bay te Hulanda y awo no por bin dilanti bin corehi y bisa cu e cifra aki tabata menos y cu ta boso ta esnan responsabel pa e aumento di e cifra aki. Te dia di awe no tin un splicacion na e pueblo di con e gobierno actual aki a core aumenta e gastonan di e Presupeusto 2017 enbes di a forsa y baha y asina deshaci di un CAft.

Contrario na tur expectativa, nan a aumenta tur e debenan y Hulanda a hari hunto cu nan, bisando: Dal bay bon idea, berdad AVP a laga debe, mientras nan tabata mirando con e gobierno actual tabata aumentando e debe y manipulando buki y den e harimento cu bo a kere cu ta cu bo nan tabata hari, ta abo nan tabata hari pasobra e aumento di debe a nifica un control mas severo y cu CAft lo mira un prolongacion.

Ta ki sorto di Minister di Finanzas e pais aki tin sinta awe, caminda un señora cu a bin den Gobierno y a bisa tur hende cera boso boca “ Toontje Lager” pasobra el a yega, e cu ta e bulldozer y sa con pa haci tur cos, a bin resulta awo e no sa conta, no sa lesa y no sa un pataca di con finansa publico ta funciona y tristesa di mas grandi cu ta placa di pueblo e ta gasta pa biaha mientras a bisa hustamente cu ta esey nan a bin pone un stop na dje.

Pa finalisa Dowers a bisa di spera cu nan realisa prome cu ta laat, paso ta saco di pueblo nan ta cabando cune y pueblo no por wanta nada mas pero tambe prome cu nan caba cu e pais aki.

- Advertisement -

DUNA COMENTARIO

Please enter your comment!
Please enter your name here