Mientrastanto mercado mericano a demostra crecimento di casi 10%
ORANJESTAD (AAN): Minister di Turismo, Dangui Oduber den entrevista cu DIARIO a indica cu ta keda un reto e hecho cu a perde e mercado turistico venezolano.
Anteriormente, pa decadanan largo, Aruba tabata haya entre 200 mil pa 350 mil turista venezolano. Debi na e situacion na Venezuela, cu ta conoci caba, por bisa cu a perde e mercado aki por completo.
Na 2018, e mercado aki a yega te na e nivel di 50 mil turista venezolano cual tabata di mas di 300 mil. Apesar di esaki, por considera 2018 un di e añanan mas exitoso den historia di Aruba, segun Oduber.
El a laga sa cu e mercado venezolano a wordo reemplaza cu e mercado mericano cual a demostra un crecimento di casi 10% . E cantidad di placa cu turistanan ta laga atras, segun e raport emiti door di Banco Central, a conoce un aumento di 8.2%, casi dobel digit, cu pa prome biaha den historia Aruba ta registra.
Esaki ta duna indicacion cu turistanan di calidad ta yegando Aruba. E aña aki, e prome 4 lunanan no a habri diferente. Ta mira e cifranan di aña pasa y ta constata cu e mercado venezolano no tey. E frontera ta cera y pesey ta focus mas ariba e mercado mericano, e mandatario remarca.
DIVERSIFICACION
A sigui bisa cu e enfasis ta ariba diversificacion pasobra e mercado mericano ta hopi bon. E crecimento di e aña aki tambe ta di dobel digit, 10%, pero ta keda vulnerabel pasobra ta depende mas y mas di e mercado mericano.
Pesey ta bezig diversificando den e mercado latinoamericano den mercadonan manera Peru, Argentina y Brazil como tambe den Canada y den e mercado europeo cu ta Inglatera, Alemania y Italia.
Tabata tin un reunion cu ATA Europe pa wak con ta bay intensifica e presencia di Aruba na Europa. Un di e retonan ta keda e oranan di vuelo cu ta hopi. Pero si un turista europeo por yega Cuba, e mester por yega Aruba tambe, a indica.
Den esey ta haciendo esfuerzonan adicional no solamente na e mercado na Hulanda, pero e mercadonan rond di Hulanda tambe manera esun Aleman, Ingles y italiano, cu ta mercadonan cu AHATA a propone como asociacion di hotelnan cu ta mercadonan afluente y cu tin hopi potencial pa trece e tipo di turistanan ey.
Dangui Oduber a laga sa cu aworaki ta bay inverti mas den mercadeo pa tin mas presencia eynan y purba haya turistanan y cu ta brinda otro experiencia.
