ORANJESTAD (AAN)- Diamars atardi a tuma lugar un conferencia di prensa caminda Sr. Benjamin Francees presidente di Pony League a anuncia y informa di e desaroyonan tocante Series del Caribe 12 pa 14 aña, cu lo bay tuma lugar for di 3 pa 7 Juli venidero.
Sr. Francees a bisa cu na 2015 el a tuma lugar caba na Aruba na nivel Caribe den categoria 11 pa 12 aña, despues na 2016 y 2017. Na 2018 a tuma un break pero e aña aki Aruba lo ta cede un biaha mas di e campeonato aki caminda e ganador lo bay representa Pony Baseball Caribbean Zone Series na Merca.
E aña aki lo bay tin 4 pais participante cualnan ta Panama, Corsow, Puerto Rico y Republica Dominicana. A scoge Aruba pasobra nan a gusta e sistema, e ambiente y seguridad y e facilidadnan deportivo cu tin pa brinda baseball.
Agda Farro kende ta coordinador general di e evento a bisa cu e weganan lo ta di 3 pa 7 di Juli, caminda dia 3 di Juli lo tin un e desfile y un ceremonia riba Plaza Padu del Caribe.
Sr. Dionisio Farro tambe a papia tocante e campeonato aki caminda el a bisa cu for di e campeonato aki a sali hungadornan grandi.
E weganan lo tuma lugar riba veld di Dragon Hitters y Aruba lo ta hungando su weganan pa 7’or di anochi caminda henter e pueblo di Aruba ta keda invita pa bay apoya e team grandemente.
