Home Cultura “Aruba Symphony Festival & Academy” 2019 ya ta den porta: di 17...

“Aruba Symphony Festival & Academy” 2019 ya ta den porta: di 17 pa 27 Juli proximo

217
0
SHARE
- Advertisement -

Entrevista cu Simon Gollo:

ORANJESTAD (AAN) — Un honor pa Matutino DIARIO di a ricibi e bishita di e Violinista y Director di Orquesta Simon Gollo ken a duna nos informacion tocante e proximo temporada di “Aruba Symphony Festival & Academy”, cu lo tuma lugar na Juli proximo, di Diaranzon 17 pa Diadomingo 27 pa 8’ or di anochi.

Ta interesante pa na prome lugar trece dilanti un reseña cortico di e hoben musico aki, cu tin un trayectoria internacional impresionante.

El a cuminza cu su cinco aña di edad y a pertenece na e Sistema Nacional di Orquesta Infantil y Hubenil di Venezuela. Cu su 9 aña el a duna su prome concierto como solista cu e Orquesta Sinfonico  di Maracaibo.

Despues cu su 11 aña a biaha pa Europa na unda el a gana concurso den diferente competencia na Italia y Suiza, y for di eynan el a perfila un carera internacional na unda no solamente el a participa pero a dirigi e orquesta den 25 pais rond mundo.

Na aña 2000 Simon Gollo a funda, den e ciudad di Maracaibo, un festival pa motibo cu e kier a brinda su pais loke el a ricibi na Europa, y hustamente e den e punto aki a nace su vision di un turismo cultural y educativo, locual ta distingui e festival aki otro festivalnan.

“E festival aki a bira e festival di musica mas importante na Venezuela cu a keda den historia. E crisis na Venezuela a obligami asumi retonan nobo na Merca consolidando un carera di hopi concierto y dunando les na institutonan prestigioso manera ‘Juilliard School of Music’”.

Simon a relata cu na Aruba, door di e Festival na Maracaibo, el a cera hopi amistad pasobra varios hoben local tabata bay Maracaibo pa e festival.

“Na 2006 mi a duna un concierto na Aruba pa recauda fondo pa Aruba Scholarship Foundation, tempo cu sr. Clyde Harms pa e hobennan cu kier a bay studia afo.

Kiermen, e festival aki tin su raiz. Na aña 2015 mi a lanta e funda ‘Aruba Symphony Festival & Academy’ cu a converti su mes den un referencia internacional, na unda cu mas cu 100 musico di diferente pais ta bin participa, contribuyendo asina na e desaroyo cultural y turistico di e Isla”, Simon a expresa.

“ Y hustamente di eynan e punto di un vision di turismo cultural ta loke ta distingui e festival aki di otro festivalnan. Musiconan di prestigio internacional ta duna cita na Aruba di 17 pa 27 di Juli tur aña cu un programacion cu ta pasa di musica folklorico y Latino Americano te e Septimo Sinfonia di Beethoven cu mi mes ta dirigi. E aña aki lo mi dirigi e Orquesta Sinfonico di e Festival”, Simon Gollo a menciona.

El a recalca cu solamente e prome y ultimo presentacion tin un costo. Pa haci e festival accesible pa henter e comunidad, e presentacionnan entre dia 18 y dia 26 di Juli ta completamente gratis.

E lugarnan ta bay ta: Cas di Cultura, Paseo Herencia, Casibari, Ritz Carlton Hotel y Free Winds.

“Ta importante pa bisa cu e Festival aki ta un esfuerzo den cual mi ta e director artistico, pero personalidadnan di Aruba ta forma parti di e Fundacion pa crea mas identidad na e proyecto aki. E vision ta cu e fundacion aki ta un plataforma di desaroyo musical, cultural, educativo, y turistico cu ta haci di Aruba un centro di atraccion internacional”, Simon Gollo a conclui, pero no sin prome extende un invitacion na henter pueblo di Aruba, amantenan di musica, studiantenan di musica, y publico en general pa no perde e siguiente Festival di Musica Sinfonico aki.

- Advertisement -

DUNA COMENTARIO

Please enter your comment!
Please enter your name here