Home General Aruba ta saluda yegada di e temporada cortico di yobida

Aruba ta saluda yegada di e temporada cortico di yobida

135
0
SHARE
- Advertisement -

Alma Arubano

Aruba! Nos tradicionnan asina rico ta inspiracion, pa na tur momento nos celebra loke Creador a regala nos.

Awe Arubianonan ta saluda e entrada pa e siman cu lo hiba nos na e fiesta di San Juan.

Tempo a bula. 24 di Juni 2019 ta dilanti porta. Fiesta di San Juan ta warda nos cu e gay dera. Nubianan ta forma rond di nos isla cu nos ta prepara pa yegada di e temporada cortico di yobida.

Awe como Arubiano nos ta busca nos cunucu. Nos ta busca e suela di nos identidad Arubano mientras na cas e damanan, chikito y grandi, ta prepara nan mes pa luci pa e fiesta di San Juan.

Secura grandi nos a conoce pero esey no ta kita nos speransa pa cambio cu lo yega mientras nos tur ta hubila y laga nos musica resona.

E zonido di chapi ta anuncia cu un dia nos lo tin cosecha abundante atrobe. Nos ta sigui e bataya pa nos suela produci alimento cu nos mester y posibilidad nobo pa un economia duradero, cu por cuida e bienestar di e pueblo Arubano.

Si e temporada cu ta cuminsa dia 24 di juni produci suficiente yobida, nos por bolbe den e campo di un futuro cu ta permiti nos corta nos maishi, pa nos traha nos papa y ofrece nos bishitantenan nos pan bati.

Mientras tocadonan ta prepara nan instrument, nan ta recorda nos cu semper lo tin futuro pa esun cu no ta entrega su herencia, no ta entrega su cultura, su identidad di Arubiano.

San Juan ta yega. Despues di secura lo tin yobida nos ta bisa nos yiunan, cu ta uni den e limpiesa di nos terenonan. Candela grandi nos lo cende den anochi pa anuncia cu e cambio pa miho ta na caminda y cu nos lo mester prepara pa futuro.

E gay ta mira e mucha cu e palo den su man. Un pueblo di alegria ta celebra San Juan.

Aruba ta uni. Aruba un famia. Aruba cu ta hisa cara pa saluda e Fiesta di San Juan!

Feliz siman na nos dushi Pueblo di Aruba.

 

- Advertisement -

DUNA COMENTARIO

Please enter your comment!
Please enter your name here