Home Editorial Arubianismo: dera gai di mal noticia y cende candela pa futuro

Arubianismo: dera gai di mal noticia y cende candela pa futuro

73
0
SHARE
- Advertisement -

Editorial

Fin di siman ta anuncia su mes awe cu preparacionnan pa e fiesta di San Juan. DIARIO a wordo introduci como un vehiculo pa sigura futuro di Arubianismo, den cual tur aspecto autentico di nos pais mester wordo entrega di un generacion pa otro.

DIARIO, un compromiso pa mantene y lucha pa e caracter autentico Arubano, awe hunto cu Aruba ta habri e fin di siman den cual nos ta bay prepara nos pais pa un temporada hopi importante.

San Juan ta uno di e simbolonan di e caracter di Aruba, un isla cu un pueblo unico cu a sobrevivi hopi buelta di bida pa lanta para y exigi autonomia pa atende cu su pais.

Pa autonomia ta un realidad, nos alma mester ta Arubano. Hamas mester permiti pa e identidad Arubano wordo poni na peliger pasobra ta Arubianismo ta haci posibel pa nos sigui dilanti.

Awe por tin mil asunto hopi importante pa yena corant. Pero e asunto mas importante ta e mentalidad Arubano cu ta compaña nos den buskeda di solucionnan importante.

Tin motibo cu Aruba semper por a yega na exito. E motibo ta simpel. Aruba ta wordo guia dor di Aruba: su fe, su pakete di balornan, su cultura, su tradicionnan, su forma di atende cu tur problema pa hunto dera e gai di mal noticia y cende e candela pa futuro.

E fin di siman aki, nos ta haci nos cunucu limpi. Secura a haci hopi daño na e produccion di nos suela, cu mester entrega nos entre otro nos maishi rabo pa e pan bati di Aruba alimenta nos.

Durante e siman aki, DIARIO hunto cu Aruba a prepara cunucu. Nos a acumula tur problema importante, cu mester wordo soluciona pa asina nos bandona un crisis cu ta kere cu e por causa mas daño na Aruba. Nos ta tene un limpiesa di nos suela sagrado y ta hunta tur sushi pa cende Diadomingo e candela di speransa y yama un futuro nobo bon bini.

Cu musica y alegria, baile nos lo yama San Juan bon bini y nos lo dera e gai cu kier a causa nos pais mas problema.

Un fin di siman cu ta demostra e importancia di mantencion di Arubianismo, e alma di nos pueblo, ta cuminsa awe.

Laga nos ban prepara pa otro siman, ora nos dera e gai cu segun historia di nos fiesta ta stroba nos exito. E gai cu a trastorna un pueblo cu sinembargo nunca a perde su identidad nacional.

Nos por a cay den un crisis financiero, un crisis economico pero hamas nos por cay den un crisis pa falta di identidad pasobra nos ta Arubiano.

Ta como Arubiano awe nos ta invita tur cu ta bini nos “Happy Island” pa e fin di siman aki, yama danki na Creador pa e suela di nos pais. Bolbe campo pa reuni den nos cunucu di alegria, musica, optimismo, fe y confiansa.

Kico temporada di yobida lo trece? E fin di siman aki ban bishita nos damnan y tankinan. Ban mira con nos tur por aporta pa na cas tambe como acto simbolico planta un mata di berdura hunto cu nos yiunan.

Aruba ban celebra e cosecha y futuro cu nos lo logra na man di e herencia mas grandi di nos antepasadonan: Arubianismo!

- Advertisement -

DUNA COMENTARIO

Please enter your comment!
Please enter your name here