Riba Dia Internacional di Dunador di Sanger:
ORANJESTAD (AAN) – Jurette Croes-Maduro a haci un introduccion cortico di e conferencia di prensa di Departamento di Salud Publico, Dialuna mainta, den cual a elabora riba te tema di Dia Mundial di Dunador di Sanger, cu ta wordo celebra dia 14 di Juni y DVG hunto cu Banco di Sanger Aruba kier concientiza nos poblacion riba e necesidad di haya mas dunador.
Sra. Croes-Maduro a indica cu e dia aki a wordo estableci desde aña 2004, pa por trece concientizacion na comunidadnan y na henter mundo, riba e importancia di dispone di sanger di calidad halto pa por salba bida.
Pa por conta cu sanger di calidad na Aruba tin su Stichting Bloedbank (Banco di Sanger) cu ta encarga cu esaki, pero logicamente pa por yega na e sanger aki mester di dunadornan.
DVG tabata tin como invitado pa e conferencia aki Stichting Bloedbank, y a hiba palabra sr. Fabian Werleman, funcionario di e fundacion aki, ken a splica tocante e trabao cu nan ta haci y con e situacion na Aruba ta pa loke ta trata dunadornan y pa concientiza mas hende den nos comunidad pa bira dunador por acerca Banco di Sanger pa cuminza cu e proceso.
Seguidamente sr. Fabian Werleman di Banco di Sanger a hiba palabra.
El a cuminza pa haci un invitacion na henter pueblo, pa Diabierna 14 di Juni awor cu ta e Dia Internacional di e Dunador di Sanger, na e opendag cu lo tin den e Banco di Sanger unda ta bay haci un presentacion di kico tur ta wordo haci cu e sanger di e dunadornan.
Tambe nan kier mustra e ultimo desaroyonan cu tin den e Banco di Sanger, pa asina trece un producto di calidad halto pa e pacientnan, segun e standard internacional cu tin.
