Home General Bloedbank tin 1600 donante pero pa cumpli cu standard internacional mester alcanza...

Bloedbank tin 1600 donante pero pa cumpli cu standard internacional mester alcanza 3 mil donante

270
0
SHARE
Coordinador Fabian Werleman hunto cu algun donante cu a acerca BloedBank pa celebra nan dia
- Advertisement -

ORANJESTAD (AAN):  Dia 14 di Juni ta Dia Internacional di Dunado di Sanger y den cuadro di esaki BloedBank a tene un ‘opendag’.

Coordinador di Banco di Sanger, Fabian Werleman, a bisa den entrevista cu DIARIO cu diabierna for di 9 am nan a cuminza cu e ‘opendag’, unda e donantenan por a pasa y celebra cu e staff di BloedBank, haya un treat y tambe esnan interesa por a pasa pa haya informacion y haci un ‘rondleiding’.

Werleman a indica cu na Aruba tin 1600 dunado di sanger den banco di sanger pero e cantidad ta mas abao di loke mester ta. E standard internacional ta duna 3% pa 5% di e poblacion y si ta basa ariba e poblacion di 108 mil habitante cu Aruba ta calcula cu tin, e ora mester tin un banco di dunado di sanger di mas o menos 3 mil hende.

E coordinador di Bloedbank a remarca cu esey ta pone mester di mas dunadonan. Pesey kier invita mas persona pa bira un donante pa asina por hisa e cantidad.

DEMANDA

El a agrega cu Banco di Sanger ta usando tur tipo di sanger pero esun cu ta wordo mas uza ta e O negativo, pasobra esaki ta e sanger cu ta uza ora di emergencia y por duna sin check ki tipo di sanger e pashent tin.

BloedBank ta pidi pa tur tipo di dunadonan di sanger:  A+, O+, B+, AB+, A-, O-, B-, AB-.

DONANTE NOBO

Fabian Werleman a sigui bisa cu pa bira donante ta sigui un procedura. Ta pidi e persona interesa pa bishita Banco di Sanger. Ta haci un intake y ta haci preguntanan di su salud, estilo di bida. ta test e sanger pa malesanan contagioso.

Despues di esey ta haci un chekeo general cerca un docter di cas. Si tur cos sali ok e ora e persona por duna sanger. E donante mester ta saludabel, e mester ta mayor di 18 aña te cu 65 aña, pero e donantenan activo por duna sanger te na edad di 70 aña, a señala.

PA TENE CUENTA

Ora di duna sanger mester tin e sucu den control , mescos cu e presion. E persona mester sinti su mes saludabel pa asina por yuda un otro hende.

Hopi hende ta kere cu esnan cu tin tattoo no por duna sanger. E coordinador di Bloedbank a indica cu pa e personanan cu tin un tattoo, tin cierto reglanan cu mester cumpli.

Cuatro luna despues di a pone e tattoo por duna sanger, a enfatiza.

Un hende muher por duna sanger cada 4 luna y un hende homber cada 2 1/2 – 3 luna.

Un persona cu a haya griep ta recomendabel pa e duna sanger un siman despues cu bira bon. Si bo ta bebiendo antibiotica, te cu 2 siman despues di termina cu e tratamento. Si bo tin menstruacion, bo por duna sanger un siman despues cu el a termina. Den caso di embarazo, ora e baby cumpli 6 luna, por duna sanger atrobe.

Si bo a haci un operacion chikito, por duna sanger te cu 1 siman despues. Operacion grandi, te cu 6 luna despues.

Esnan interesa di haya mas informacion por yama of bishita Stichting BloedBank, ubica na Dr. Horacio Oduber Hospital, number di telefon: 587-0002.

Ariba diabierna, esnan cu a pasa BloedBank pa uni na e celebracion aki por a disfruta di snacks, cupcakes, bolo, coi bebe como muestra di aprecio.

 

- Advertisement -

DUNA COMENTARIO

Please enter your comment!
Please enter your name here