Citgo Aruba ta parti di investigacion criminal na Merca

    712
    0
    SHARE
    - Advertisement -

    Martinez tabata uza negociacionnan pa acto di corupcion

    *Acuerdo Citgo ta mara Aruba na un ambiente criminal

    *Desenlace Citgo ta mas serio cu posibilidad pa ehecucion

    ORANJESTAD (AAN) — “Na e momentonan aki, Aruba mester wordo prepara pa algo mas cu un decision si ta mantene e proyecto Citgo of no. Aruba lo mester contesta tur pregunta relaciona cu e hecho cu autoridad Mericano a dagvaard Citgo den cuadro di actonan criminal cu ta wordo investiga. Esaki no tin ningun relacion cu medida economico di Merca contra Venezuela, pero solamente relacion directo cu actonan criminal cu ta bou investigacion.”

    Esaki ta informacion importante cu DIARIO a ricibi di parti di informantenan cu ta mustra cu Citgo ta mara na tempo pa duna contesta na autoridad Mericano cu a dagvaard e empresa pa crimennan cu e ta investiga actualmente.

    “Citgo Aruba ta parti di Citgo. Aruba a mara su mes na un ambiente criminal den e acuerdo di Citgo. No tin ningun hustificacion pa e hecho cu Gobierno Mike Eman a yega na un acuerdo cu Citgo na un momento cu no tabata tin ningun beneficio pa Aruba,” un informante experto a revela na DIARIO.

    A mustra DIARIO cu tin aspectonan sumamente importante den e totalidad di Citgo.

    No ta normal cu un gobierno ta mara un pais na un contracto cu tin mas peliger cu beneficio pa e pais. Esaki sigur tabata e caso cu e proyecto Citgo si tene cuenta cu e situacion financiero di Citgo mes y di gobierno Venezolano di e tempo.

    “Tin tur prueba cu placa bruto tabata wordo horta den Citgo dor di e grupo cu a negocia cu Aruba y tin laso directo cu regimen Nicolas Maduro,” otro informante a trece dilanti.

    E prome pregunta cu lo wordo haci na Aruba ta, si e pais no a laga haci un investigacion di Nicolas Maduro, cu ya tabata wordo acusa dor di instancianan oficial di ta uza Citgo pa labamento di placa.

    “Cualkier gobierno cu ta acerca un grupo pa negocia un contracto, ta evita di asocia su mes cu un grupo cu mal nomber den asuntonan di contracto. Den e caso aki Aruba a negocia cu personanan cu ta wordo acusa di tabata alcansa contractonan cu corupcion y ladronicia. Hasta a papia di droga,” e informantenan ta bisa DIARIO.

    Sumamente importante ta bira e beneficio cu Aruba mester tabata tin cu e proyecto. For di 2014 tabata conoci cu Citgo y Venezuela ta den problema financiero serio.

    Ora Aruba a negocia cu Maduro, loke Maduro y su grupo tabata busca tabata mas ruta pa nan por laba placa manera investigacionnan mundial ta mustra. No tabata tin posibilidad cu Maduro lo tabata por a produci e placa pa realisa e proyecto pasobra Maduro mes a uza Citgo pa e haya placa.

    Informantenan a indica cu hasta un negoshi chikito, lo no a negocia cu un grupo di mal reputacion manera esun di Citgo y sigur Nicolas Maduro.

    Aruba mester contesta tur pregunta cu wordo haci na Aruba.

    “No mester keda sorprendi si no solamente Citgo Aruba mester duna contesta riba preguntanan cu lo cay den e proceso di investigacion na Merca,” a wordo mustra na DIARIO.

    “Tin un chens serio cu gobernantenan di Aruba lo mester contesta con e negociacion a tuma luga. Mester contesta tambe pregunta pakico nan a pone tur advertencia pa riesgo un banda. Esaki ta hopi importante pasobra ni sikiera a permiti Parlamento conclui cu ta trata di un proyecto peligroso pa Aruba,” informacion ricibi ta indica.

    Parlamento di Aruba na e momentonan aki mester bay cuminsa prepara pa un situacion serio cu e pais ta aden.

    “Ta corupcion cu contracto, transferencia di placa, supuesto proyectonan ta loke ta bou investigacion y e acuerdo entre Citgo y Aruba sigur ta parti di e investigacion profundo cu autoridad Mericano ta haci,” a wordo mustra na DIARIO.

    - Advertisement -

    DUNA COMENTARIO

    Please enter your comment!
    Please enter your name here