Home General Citgo ta canta e morto di democracia y futuro di Aruba!

Citgo ta canta e morto di democracia y futuro di Aruba!

547
0
SHARE
- Advertisement -

Analisis 

Ta parce increibel cu na un pais cu un cuadro legal democratico, un grupo di politico por a percura pa un bofon total di democracia. Loke a pasa cu Aruba na 2016, no tin nomber. Un partido cu pueblo a entrega su confiansa, a base di un serie di mentira a hinca e pais den un desaster economico total.

Tempo a pone tur e cartanan riba mesa pa Aruba cu awor mester puntra su mes kico a resta di principionan democratico na e pais.

Ainda nos por bisa cu tin democracia na Aruba? Lubida!

Na 2016 prueba a wordo duna cu tin luga na Aruba pa mente dictatorial, cu ta trapa riba e macutu di balor di e pais, principionan sagrado di e pais, leynan di e pais, pa haci loke e kier.

Na 2016 a keda demostra na Aruba, cu Parlamento mester cera su boca y acepta loke gobierno kier pa pasa aunke esaki ta contra tur bienestar di e pais.

Na 2016 democracia a muri ora un gobierno a humilia bos di pueblo, a humilia y haci bofon di Parlamento pa sigura su mes cu loke el a negocia cu un gobierno dudoso, lo pasa den Parlamento.

Na 2016 contra leynan di Aruba, a introduci e proyecto di Citgo cu a wordo negocia cu un regimen busca pa husticia na diferente pais pa introduccion di un compania hipoteca cu Rusia y otro companianan cu a duna Nicolas Maduro placa.

Na 2016, un gobierno cu a hinca Aruba den debe, a percura cu su maneho pa crea un desastre financiero, a completa su obra cu introduccion di e acuerdo Citgo cu awe tin Aruba den un catastrofe.

Mientras Aruba ta hoga den e crisis cu gobierno di AVP a laga atras, kico a pasa cu e autornan di e actual calamidad cu Aruba conoce?

Nada! Mike Eman cu a cana pidi pueblo 15 asiento, a dicidi cu e no ta drenta Parlamento. El a bira profesor na islanan chikito, ocasion cu amigonan ta crea na un universidad amigo, caminda ta haci hende kere cu el a percura pa un futuro di mil maraviya na Aruba.

E otro Mike a bira cientifico y ta cana splica con horcan ta move mientras ta sigui tilda tur otro politico cu nan no kier a trece Citgo.

Unda democracia a keda na Aruba? Den cual deposito straño a bay depone? No por ta posibel cu despues di 2016 ainda Aruba ta bisa cu e conoce democracia cu mester sirbi pueblo y no un grupo di politico cu kier haci Aruba nan propiedad.

Historia di Aruba, cu tabata un ehempel pa nacionnan grandi, awor a bira un berguensa cada bes cu nomber di Aruba wordo asocia cu un acuerdo cu Nicolas Maduro, cu a hari Aruba den cara di Aruba.

Kico ta bay pasa cu Aruba? Puntra e doñonan di e piñata Citgo, cu nan a uza pa destrui e pais.

Awe un Aruba den crisis, den problema serio, ainda mester soporta nan stem riba baricada, caminda nan ta drumi warda un chens pa bolbe haya poder riba un pueblo cu nan a destrui.

Nan nomber lo drenta historia como asaltante di nos sistema democratico, cu a yega na un fin na 2016, ora Nicolas Maduro a hari y sigui hari pa sink democracia y bienestar di Aruba hunto cu su amigonan Mike y Mike.

- Advertisement -

DUNA COMENTARIO

Please enter your comment!
Please enter your name here