Citgo ta e pagina mas scur den historia di Aruba

    520
    0
    SHARE
    - Advertisement -

    Nicolas y Grupo Martinez a bringa pa placa tras di prestamo

    *E dignidad di un pais cu a haci sacrificio ta na wega

    *Parti administrativo pa Gobierno y investigacion pa Husticia

    ORANJESTAD(AAN)–For di momento cu inicio a wordo duna na e Caso Citgo, e prome letternan a wordo skirbi riba loke a bira un pagina preto den historia di Aruba. No tin palabra ni termino pa uza pa situacionnan cu e investigacionnan di DIARIO a revela.

    E hecho cu Minister Presidente Wever-Croes a pone gruponan di trabou traha riba e futuro di Aruba, no por nifica cu ta cera e pagina mas tristo di historia di Aruba sin cu autoridad hudicial investiga si tin base pa start un caso penal na Aruba.

    Algo sumamente serio a pasa cu Aruba manera cada pagina cu habri den e investigacionnan ta revela. Mentira contra comunidad di Aruba cu a wordo hinca den un trampa cu e soño di 15 porciento crecemento economico dor di e acuerdo cu a cera cu hendenan cu husticia mundial ta persigui,

    Pa duna prueba cu hasta e asunto cu ta habri un caso di investigacion den Corte na Venezuela no ta basa riba berdad, DIARIO awe ta produci e caso den cual directamente ta acusa gerencia di Citgo pa droga, corupcion, ladronicia y labamento di placa.

    Nicolas Maduro y Asdrubal Chavez tin tur e documentonan cu awe DIARIO ta sigui publica y cu un di nan hendenan mes di antes, awor a pone den man di Hues na Merca despues cu nan a manda su persona cas pasobra e no tabata kier ta complice den crimen.

    Cu luho di detaye ta describi loke personanan cu manera potret ta mustra tabata hopi cerca di funcionarionan di Aruba y tabata tin papel clave den e desaroyonan, tabata comete actonan criminal den e tempo cu Aruba tabata negocia y a introduci e proyecto na Aruba den un scenario contra ley.

    Na un forma ilegal gobierno anterior a introduci e proyecto na Aruba cu awor lo wordo investiga dor di husticia internacional dor cu placa a bini Aruba.

    Pa completa e obra, e documento di e caso di Maduro contra su compañeronan cu  a pasa dushi rato den compania di funcionarionan na Aruba, no ta acusa Martinez di actonan criminal cu ya riba tereno internacional polis ta investiga y pa cual a dagvaard Citgo.

    E documento cu DIARIO ta publica ta mustra cu Maduro a rabia pasobra tras di su lomba Nelson Martinez y e grupo cu a haci Aruba nan cas, a trata na haya un prestamo cu Citgo como borg di otro compania cu esun cu Maduro tabata kier pa duna Venezuela borg contra cierto “beneficio” pa Venezuela.

    Pues hasta e debe cu tin cu Citgo como borg, lo wordo investiga internacionalmente, segun informantenan, cu a indica cu no mester descarta cu aki tambe tabata tin beneficio personal dor di regimen Maduro.

    Aruba a cay den un situacion nunca bisto den su historia. Ningun scandal cu e pais a yega di conoce por supera loke a kibra economia di Aruba pa no papia mes di e daño cu a haci na e bon nomber di Aruba.

    Autoridad mester haci nan trabou y den cooperacion cu polis y cuerponan di investigacion internacional mester investiga kico a pasa cu Citgo.

     

    - Advertisement -

    DUNA COMENTARIO

    Please enter your comment!
    Please enter your name here