Tocante preocupacion di SPO y Traimerdia:
ORANJESTAD (AAN) – Den conferencia di prensa di fraccion di MEP, Parlamentario Edgard Vrolijk a hiba palabra, relaciona cu e tema di enseñanza y e manifiesto cu trahadornan di Traimerdia a presenta na Gobierno.
E parlamentario sa cu hopi hende tin pregunta principalmente tocante SPO y Traimerdia, pero locual e ta haya hopi importante pa comenta, ta e rol di Parlamento y e rol di Minister.
Minister tin su autoridad pa hiba maneho pa maneha e pais y Parlamento tin e rol di controla. Parlamento no por para tur maneho, pero manehonan cu ta desproporciona, hopi biaha nan ta pidi un minister pa haci cambio, adapt’e of par’e, na bienestar general di e pais.
Un di e tareanan di mas grandi cu Parlamento tin ta trahamento di ley y control di presupuesto.
Tocante e manifiesto cu a wordo presenta Diabierna Parlamento tambe tin cu atende cune, y parlamentario Vrolijk ta kere cu hopi di e preocupacionnan cu tin ta valido tambe.
El a subraya cu ora algo tin di haber cu e pan di tur dia di un trahador, of ora tin cambionan drastico pa su funcionamento, tin cu scucha pueblo y trece claridad den esaki.
Diabierna tabata tin reunion cu e Comision Central di Staten, cu esnan di SPO pariba y Santa Cruz, y nan a trece nan preocupacionnan dilanti y mester para scucha nan. Vrolijk a subraya cu e ta un di e politiconan cu no ta para pa show, den sentido cu Diabierna el a mira coleganan cu durante e manifestacion cu e no sa wak nan na trabao mes, pero Diabierna diripiente ora nan a wak poco hende pafo di Parlamento nan a bira un sorto di monstruo y papia tur sorto di cos, pero ora tin reunion paden, no ta wak nan mas, y esaki ta di lamenta.
E parlamentario a señala cu e tipo di politica aki ta haci hopi daño na comunidad y vooral cu temanan serio asina y sigur enseñanza cu ta toca nos pueblo, nos muchanan.
Durante e reunion di Comision Central fraccion di MEP a pone un punto extra cu ta e preocupacion di Traimerdia, cual no tabata riba agenda.
Parlamentario Edgard Vrolijk a bisa cu despues di a scucha e maestronan di SPO nan preocupacionnan, nan kier claridad y cosnan concreto: si tin cambio riba nan curriculum, si ta bay traha cu metodo nobo, ki tempo e lo wordo implementa, ki tempo nan tin pa prepara, etc. Nan kier claridad! Minister ta duna un cifra di cuanto mucha ta bay SPO mientras e scol tin otro cifra. E parlamentario a subraya cu unico forma di trece claridad ta den un reunion publico.
E parlamentario a dirigi e comision como vicepresidente, y for di e miembronan cu tabata tey a sali un carta cu el a firma como tal, cu e peticion pa un reunion publico urgente prome cu dia 20 di Juni aki.
Esaki pasobra tin parlamentarionan cu ta biahando pa e reunion di IPKO y e proceso di aña escolar ya ta cabando y esaki ta algo urgente. No obstante e presidente di Parlamento y tambe e Minister mester ta disponible pa e reunion publico aki tuma lugar, y ta resta dos dia pa yama e reunion aki. Mirando e seriedad di e caso e ta spera cu e Comision Central por haya oido y e reunion aki por ser yama ainda.
