ORANJESTAD (AAN): Diabierna mainta e sospechoso di e lamentable asesinato di e tan keri Camilo Carreño-Sosa ta tuma lugar.
Na Februari 2019 caba, e sospechoso homber Ryson Paskel (di 20 aña) a presenta den Sala di Corte cu mannan y pianan geboei. Den sala di Corte tabata presente tambe mayornan y amistadnan di e victima.
ASESINATO:
E acusacion cu Fiscal a presenta contra Ryson Paskel ta cu premedita y intencional, el a hinca Camilo Carreño Sosa (di 22 aña) mata dia 2 September 2018, patras den e parkinglot di Arawak Gardens na Palm Beach.
Ta asina cu Ryson Paskel despues di e acto, a drenta un Toyota Pickup color cora y a huy. El a keda fugitivo te 30 October 2018, ora cu a gare scondi den un cas na Santa Cruz.
E sospechoso Ryson Paskel aki apenas algun dia prome a sali for di Prison di KIA pa otro caso, y a haye ta mata e hoben tan keri aki na Palm Beach. Nan confrontacion a start banda di Sand Aruba, y a finaliza den parkinglot patras di Arawak Gardens.
Na Februari 2019, Fiscal a bisa cu e caso ta pro forma pasobra cu e procesverbaal ainda no ta cla. Fiscal a propone 14 Juni 2019 pa 9’or di mainta pa trata e caso. Hues a bay di acuerdo y a pospone e caso pa 14 Juni 2019 pa 9’or di mainta.
Por a nota cu pafor di edificio di Corte, familiarnan di e victima tabata para cu banner cu e potret di e victima y tambe borchinan cu diferente mensahe entre otro” No tin paz sin husticia. No tin husticia sin pordon.
DIARIO lo cubri e caso y lo informa lectornan tur loke a sosode den sala di Corte di Husticia di Aruba.
