ORANJESTAD (AAN): Diabierna mainta e Canades M.G. ta bolbe presenta den Corte di Husticia di Aruba, pa mira si tur cos ta cla pa tratamento di e caso e aña aki.
E sospechoso M.G., for di Mei 2017 ta encarcela como sospechoso di e asesinato di Chines H. Quach procedente di Canada.
Na April 2019 tabata ultimo biaha cu M.G. a presenta den Corte caminda a palabra cu Diabierna 28 di Juni e tin cu bolbe.
Durante tratamento di e casonan anterior, M.G. a bisa Hues cu el a simplemente haci uso di su derecho di keda keto. E ta haya cu tin sospechoso a worde laga liber. E ta kere cu ayudo di abogado lo bin claridad den e caso aki. El a bisa cu e no a tira y no kier a haci nada malo cu e victima. El a bisa cu si e bay duna declaracion, e lo bay punta dede riba otro y esey lo pone su famia na peliger.
Segun M.G., Hues no conoce su cultura na Canada cu si e bay papia e por pone bida di su famia na peliger. Pesey el a tuma decision di keda keto y tin fe den su abogado cu lo trece claridad. E ta kere cu e berdad ta sali na cla.
Na April 21019, Hues a bisa cu for di autoridad Canades a haya e informe cu un di e testigonan, K., a worde asesina. E otro dos no por haya. E amiga di esun asesina no kier papia pasobra e ta teme pa su bida.
A pone condicion pa por scucha e señora. Awor ta asina leu cu e dama a duna declaracion.
DISCUSION:
M.G. mes a bisa Hues cu e ta haya cu su derechonan ta worde viola. E ta sinti incomodo pa trata e caso y el a bisa cu e tin pensa di busca otro abogado pasobra e ta haya cu e abogadonan no a splike tur cos. E ta haya cu no tin un caso husto.
Fiscal a remarca cu durante e pause pa e abogadonan papia cu M.G., el a bay controla declaracion di e dama na 2017 kende a bisa cu nan tur tabata fiesta den sala y patio y e porta tabata habri.
E no a bisa cu e tabata den cushina. El a scucha discusion den promer piso. Fiscal a pidi pa rechaza e peticion di abogadonan. Fiscal ta lamenta cu abogadonan kier pospone e caso pasobra a haya e documentonan laat. E ta haya cu e caso aki ta andando basta tempo y no ta kere cu mester pospone e caso.
Hues a reacciona riba M.G. su reclamo cu no tin un caso husto y cu su derechonan ta worde viola. Hues a bisa M.G. cu no ta M.G. ta dicidi ki ora mester trata e caso sino Hues ta dicidi esey. Hues despues di a evalua e procesverbaalnan di e otro casonan cu a pospone e caso un rato pa bay dicidi riba e diferente peticionnan di abogadonan. Hues a bolbe y a bisa cu e ta haya importante proceso di caso husto. Ta pesey a bay a scucha e testigonan na Canada. Sinembargo tin un limite. E dama a worde scucha pero F. ta inlocalisabel. No tin indicacion cu lo por haya F. y tampoco tin indicacion cu e interogacion lo sosode riba tempo cortico.
Hues a bisa cu e ta rechaza e peticion pa scucha F. na Canada. E peticion pa scucha e dama a base di e mapa di e cas cu a yega laat Hues a remarca cu si mira declaracion di e dama, el a bisa cu e tabata den sala y a mira M.G. baha trapi y bay den un camber. Hues no ta haya suficiente motivacion pa bolbe bay scucha e dama. Hues a sigui bisa cu e no ta haya cu ta viola M.G. su derecho di proceso husto door di rechaza peticion pa scucha e testigonan. Hues a rechaza tambe e peticion pa pospone e caso pasobra M.G. no ta sinti’e bon prepara. Hues a mustra cu desde 1 Mei 2017, M.G. ta encarcela y cu Corte a prepara pa awor trata e caso. Na Maart 2019 a scucha e dos testigonan na Canada y basicamente nan a bisa cu nan no ta corda nada.
M.G. a bisa cu e ta deshaci di e dos abogadonan pasobra e no sa nada con nan lo hiba su defensa. E kier abogado nobo.
Fiscal a bisa cu e no por bisa nada riba esaki. E ta haya e dos abogadonan ta conoci y bon reputacion na Ministerio Publico. Hues a dicidi di pospone e caso pa e abogadonan, cu a keda sorprendi cu e postura di M.G., papia cun’e.
Ora nan a bolbe den sala, M.G. a bisa Hues cu el a papia cu e abogadonan y e ta haya cu nan no a dun’e suficiente informacion di e caso y pesey no ta sintie comfortable. El a bisa cu nan a bis’e cu lo bay dun’e informacionnan. Na opinion di M.G., si esey sosode, e relacion lo por drecha pero awor aki no.
Hues a hala MG. su atencion cu si e busca abogado nobo, no lo bay cuminsa un proceso nobo sino lo sigui manera e caso ta awor. Hues a pospone e caso pa Diabierna caminda lo bay dicidi un fecha pa tratamento di e caso.
