Home Hudicial Diabierna sentencia ta cay pa trio Venezolano cu a trece cantidad di...

Diabierna sentencia ta cay pa trio Venezolano cu a trece cantidad di ilegal den boto y dos a hoga

924
0
SHARE
- Advertisement -

Fiscal a exigi 10 aña di prison pa cada un

ORANJESTAD (AAN): Diabierna mainta e tres homber Venezolano A.C., J.C. y A.L. mester presenta dilanti Hues pa scucha nan sentencia. E trio aki riba 20 October 2018 a trece cantidad di ilegal Aruba caminda dos di e grupo a hoga ora nan tur a bula na awa pa yega tera. Fiscal a exigi 10 aña di prison pa cada un.

Algun siman pasa tratamento di e caso aki a tuma lugar, caminda e trio a bisa Hues cu tur hende den e boto a sera placa pa asina cumpra e boto pa navega bin Aruba.

   DOS HENDE A HOGA:

Hues a mustra cu dia 20 October 2018 mas o menos 3.30 di marduga, autoridad a haya 4 hende a yega tera. Despues a haya boto. Despues a haya curpa sin bida di un homber na canto, kende a hoga. Despues a haya di dos curpa di un homber hoga den laman mas o menos 12 meter for di e boto. Tur tres sospechoso ta admiti di tabata riba boto.

Den vecindario di e boto a haya 4 otro ilegal homber.

Tin declaracionnan di esnan gara, ta papia di 30 ilegal den e boto. Na dado momento e boto a pega cerca di canto, mas o menos 20 meter y nan a bula den laman pa bin tera pero laman tabata hundo. E holanan tabata halto y coriente tabata fuerte. Segun esnan cu a interoga, tur hende a bula di nan mes den laman. Ningun hende a worde forza pa bula.

Un di e personanan a bisa cu J.C. tabata esun cu el a paga. Ta J.C. segun e persona, a prepara e viahe. A.L. tabata esun cu tabata navega e boto. Tambe a menciona cu A.C. lo tabata yuda. A.C. a desmenti y a bisa cu e tabata mescos cu e otronan cu a bin Aruba pa busca trabao.

A haya un cellular di un di e ilegalnan y tabata scucha papiamento di e viahe pa Aruba. Por a scucha J.C. ta papia tocante e viahe pa Aruba.

Hues a bisa cu tin un duda cuanto persona tabata abordo. Tin persona ta bisa 30 persona, otro ta papia di 20 y J.C. ta papia di 12. Hues a remarca cu no por ta asina cu tur a cumpra e boto. El a mustra cu na Polis, J.C. a bisa cu hunto cu su ruman A.C. tabata busca e hendenan y cu A.L. tabata e capitan. A.C. tabata esun cu tabata saca awa for di e boto. Tambe cu nan tabata gana placa pa transporta cada persona. A.C. a bisa Hues cu tur tabata yuda otro den boto. Hues a mustra cu A.L. a bisa Polis cu e tabata navega boto y J.C. tabata esun cu tabata ricibi tur placa.

Hues a puntra A.L. si a forza hendenan pa bula for di e boto. A.L. a bisa cu no tabata asina. El a bisa cu tur a pusha otro for di e boto. Segun A.L., e no tabata encarga cu e viahe di e hendenan. A.L. a splica cu un motor a daña y el a yuda pa drecha esaki pa sigui nabega.

   EXIGENCIA DI FISCAL:

Fiscal a bisa cu e ta haya legalmente proba cu e trio aki tabata encarga cu e traficacion di ilegal pa Aruba riba 20 October 2018. Fiscal a cuestiona e hecho cu nan tabata den un boto, sin luz, sin sistema di navegacion y sin salba bida. A pone bida di tur abordo na peliger.

Lamentable tabata e hecho cu dos homber a hoga na momento cu mester a bula for di boto y landa pa yega tera. Si tabatin salba bida, esaki lo no a sosode. Fiscal ta haya cu tur tres ta mesun culpable y a exigi 10 aña di prison pa cada un.

Diabierna mainta DIARIO lo ta den Corte pa scucha sentencia y lo informa lectornan di tur loke a sosode den sala di Corte di Husticia di Aruba.

 

- Advertisement -

DUNA COMENTARIO

Please enter your comment!
Please enter your name here