Home General Diaranzon lo tin contesta di Prome Minister riba e manifiesto di Traimerdia

Diaranzon lo tin contesta di Prome Minister riba e manifiesto di Traimerdia

118
0
SHARE
- Advertisement -

Magaly Brito, SEPPA:

ORANJESTAD (AAN) – Secretario General di SEPPA sra. Magaly Brito, tocante e entrega di e manifiesto di Traimerdia, a tuma nota di e contenido di esaki y e preguntanan cu tin pa e minister.

E sindicalista a dirigi na e trahadornan mes tocante esaki, y a bisa nan cu pa Diaranzon ta spera cu gobierno lo tin un afspraak of un contesta riba e carta. Esaki por ta por escrito of den un reunion.

E manifiesto a wordo titula “Enseñanza ta bao di atake” na diferente nivel.  Brito a bisa nan cu tanto nan como trahadornan di Traimerdia como e otronan cu ta sostene e mundo di enseñanza ta hibando un bida intrankil, casi teroriza, pa motibo di e diferente cambionan cu ta bay tin, sin tin ni pia ni cabes.

Sra. Brito a subraya cu particularmente nan di Traimerdia, na e momentonan aki, SEPPA ta compronde nan preocupacionnan y cu e minister ta mishi cu nan posicion huridico na momento cu e ta kita cierto aspectonan cu ta dentro di nan posicion legal y haci cierto expresionnan si nan ta prepara of no.

“Boso como trahador, como empleadonan publico cu pa mas cu 20 aña a bin ta ricibiendo formacion na diferente nivel, preparacion pa asina boso por brinda servicio di calidad na e centronan di Traimerdia, ta un lastima cu e parti cu ta hopi importante cu tambe ta sostene boso cu ta e centrum leiding y e huiswerk begeleiding ta wordo kita of adapta na un manera cu ta haci comosifuera cu boso servicio no ta uno halto, sino estilo crèche tin y e kier converti esaki den un veld unda boso ta simplemente mira kico e muchanan ta haci y na final ta e muchanan ta dicidi si nan kier haci huiswerk of no, si nan kier bay hunga of scucha musica, etc, locual ta haci cu boso trabao no tin contenido”, sra. Magaly Brito a expresa.

El a agrega cu haciendo kiermen cu no tin futuro ni carera y di facto e trahadornan ta stanca eynan.

E sindicalista ta spera cu e minister duna bon atencion na e preocupacionnan aki, y wak loke a wordo mustra cu no ta di ayera pa awe a lanta pa e manifestacion aki, pro cu e trahadornan di Traimerdia tin lunanan tras di esaki. Siman pasa SEPPA a pidi e minister pa tur documento ta riba mesa pa evalua e cambionan y unda por mustra na ki lugar ta afecta nan posicion huridico, pero e no a haci esaki. Awor cu ta na bispo di ceramento di aña escolar e kier bin cu e cambionan y ta mescos cu ta nifica cera aña escolar cu problema y habri aña escolar nobo cu problema.

Esaki no ta deseable pa Pais Aruba, ni pa e muchanan y tampoco e ta trece claridad pa e mayornan cu ta depende grandemente, di e servicio cu Traimerdia ta brinda na nos comunidad.

“Nos ta keda na spera di decision of cualkier reaccion cu boso representantenan ta haya Diaranzon for di gobierno”, sra. Brito a acentua.

Sra. Brito a transmiti e reaccion di Minister Presidente cu a indica cu a base di contenido di e carta aki, cu ta basta largo, y cu e lo analiza e puntonan y busca mas informacion, e lo contesta. El a agrega cu esaki ta prome biaha cu Minister Presidente ta baha pa atende un delegacion y bay den reunion cune, y tuma nota.

- Advertisement -

DUNA COMENTARIO

Please enter your comment!
Please enter your name here