Home Cultura Diasabra otro siman tin prome Careda di Museo

Diasabra otro siman tin prome Careda di Museo

39
0
SHARE
- Advertisement -

ORANJESTAD (AAN): E aña aki Museo Historico Aruba, miho conoci como Fort Zoutman, ta cumpliendo su di 35 aniversario y nos ta celebrando esaki por medio di diferente actividad durante e aña aki.

Ademas di e eventonan exitoso cu a worde organiza ariba Dia di Betico y 18 di maart na e diferente localidadnan cu ta cay bou di Fundacion Museo Arubano (FMA), e fundacion tambe tabata hopi activo treciendo mas conocemento cerca nos muchanan.

Den maart FMA a cuminsa cu nan competencia di pintamento. A hiba un pintura na tur scol preparatorio na Aruba y a pidi e cooperacion di DPL, SKOA y e docentenan pa asina e muchanan por a participa den e competencia. Den e ultimo siman di mei e team di FMA a haci un pre-seleccion for di e 2.500 pinturanan cu a worde entrega pa asina despues e comision por a saca tres ganador.

E personanan cu a forma parti di e comision aki tabata Vicky Arens, directora di Cas di Cultura, Ray-Anne Hernandez, directora di Unoca, Johan Stoppels, propietario di Freeway, Lincoln Gomez, presidente di board di FMA y Joanne Dirksz, directora di Cosecha.

E prome y e di tres lugar a bay pa studiantenan na Scol Preparatorio Rayo di Solo y e di dos lugar a bay pa un studiante na Jacinta Kleuterschool. Ademas di a pasa entrega e premionan na cada ganador, e pintura cu a sali na prome luga cu ta di Padma Piar, lo worde uza riba e t-shirt pa e Careda di Museo.

Den e luna di mei FMA tambe a pasa bishita e 4e klassen di tur e scolnan basico na Aruba. Diasabra 18 di mei tabata Dia Internacional di Museo y a dicidi pa uza full e luna di mei pa introduci nos museonan na e muchanan mas grandi. E team di FMA a duna un presentacion y a splica kico ta e historia di Aruba cu por haya den e museonan, ademas di tambe a hiba artefactonan di antaño pa haci e muchanan mas curioso.

Pa termina e aña escolar 2018-2019 FMA a dicidi di haci algo diferente y cu ta stimula nos muchanan tambe di un manera positivo.

Pesey a pensa pa organiza un Careda di Museo cu lo tuma lugar diasabra 29 di juni na Stadion Guillermo Prospero Trinidad pa 4:30 di atardi. Pa registra por haci esaki online na www.caredadimuseo.com of pasa personalmente na IBiSA. Entre 24 y 28 di juni por pasa busca e t-shirt y BIB na IBiSA.

E obhetivo di e careda ta, di un banda, pa stimula un bida activo y saludabel den nos muchanan y, di otro banda, tambe pa FMA por recauda fondo pa por sigui cu e proyectonan educacional, manera e vakantiekampen den juli y october, otro tayernan cu ta focus riba nos propio herencia y pa nos por keda bishita nos scolnan pa sigui concientiza e comunidad.

FMA kier a gradici tur e companianan cu ta dunando sosten pa por haci e evento aki posibel pa nos muchanan.

- Advertisement -

DUNA COMENTARIO

Please enter your comment!
Please enter your name here