Home Hudicial Diesdos aña di prison exigi pa Ryson Paskel cu a mata Camilo...

Diesdos aña di prison exigi pa Ryson Paskel cu a mata Camilo Sosa

1433
0
SHARE
— Ryson Paskel a keda fugitivo pa basta siman na Aruba.
- Advertisement -

ORANJESTAD (AAN): Manera DIARIO a publica, ayera mainta pa oranan largo a tuma lugar tratamento di e caso penal contra e homber Ryson Paskel (20), acusa di a hinca Camilo Carreño-Sosa (22) mata dia 2 September 2018 patras parkinglot di Arawak Gardens mata.

Fiscal a cuestiona e hecho cu despues di a hinca mata, Paskel a bay sconde y despues di casi 2 luna a logra detene. Fiscal no ta haya cu aki por papia di premedita pero ta haya cu Paskel, ningun momento a mustra di tin duele di loke el a haci. Fiscal a exigi 12 aña di prison, kitando e tempo cu e ta sera.

Ademas di e acusado Paskel di a mata Camilo, Fiscal a acusa Paskel tambe di a maltrata y menaza un homber di inicial M.C.

Fiscal a mustra cu Paskel a keda fugitivo te 30 October 2018. Ryson Paskel a drenta sala di Corte cu mannan y pianan geboei. Mama y tata di e victima y tambe famianan y amistadnan tabata sinta den e sala abao mientras cu den piso tabata famia di e sospechoso Paskel.

   MALTRATO Y MENAZA:

Hues a bisa cu Paskel a admiti cu el a bay na cas di M.C. y a dal’e y menace. Esaki door cu Paskel a haya sa cu M.C. a abusa di su amiga. Tambe Paskel a admiti di a horta na Brandweer.

   HINCA MATA:

Hues a mustra cu dia 2 September 2018, e victima Camilo tabata hunto cu su amigonan na e lugar di Sand Bar. Camilo a mira Paskel y a bisa su amigonan cu Paskel a horta su auto. El a bay reclama Paskel y nan a bringa. Tres di e amigonan a yuda Camilo bringa contra Paskel. Paskel a cay y su t-shirt a kibra. Paskel a lanta y kita su t-shirt. Hues a bisa cu riba imagennan di camera di seguridad Polis a mira con Paskel y e otronan cu tabata hunto Camilo, tabata haci movecion manera ta bay sigui bringa pero nada no a sosode.

Hues a bisa cu mirando cu e imagennan ta hororoso e no kier pasa esakinan riba pantaya pa tur hende den sala mira. Fiscal a bisa Hues cu e si kier pa confronta Paskel cu esakinan pero cu lo pasa e imagennan riba laptop computer di Fiscal dilanti Hues y Paskel lo bay dilanti mesa hunto cu su abogado pa mira esakinan. Hues a sigui bisa cu un rato despues Paskel a bay y Camilo cu dos amigo tabata canando pa e parkinglot patras di Arawak Gardens.

Diripiente ta mira Paskel ta core bay riba Camilo y tabata haci movecion di hinca y a core bay. E amigonan a core tras di Paskel y Camilo ta zak den otro. Mientras cu Hues tabata bisa con tur e hincamento a sosode, tata di e victima tabata cabez abao wowo yen awa. E mama tambe tabata hopi tristo y hasta a yora.

   PASA VIDEO DI HINCAMENTO:

Fiscal cu su laptop a bay dilanti e mesa di Hues y a bisa Paskel cu su abogado mr. Lejuez pa bay dilanti pa asina Fiscal, Hues y e acusado mira e imagennan. A haci Paskel diferente preguntanan a base di e imagennan.

Paskel a bisa cu ora Camilo a dal’e den su cara, el a perde cabez. El a bay for di e lugar pero e rabia a keda den dje y el a pasa back den su auto y e ora ey el a baha cu un cuchiu y a bay hinca Camilo.

Fiscal a bisa cu a haci investigacion na e cas di Paskel pero no a haya e cuchiu. Fiscal a bisa cu a base di descripcion Paskel a duna a busca riba internet imagen di un cuchiu. Hues a bisa cu patologo ta bisa cu e hinca ta mas o menos 15 cm hundo cu ta mustra cu e cuchiu mester ta 15 cm largo.

   FUGITIVO 2 LUNA:

Ta asina cu dia 29 October 2018 Arestatie Team a detene Paskel caminda hasta tabatin tiramento pasobra Paskel a purba huy. Hues a puntra pakico Paskel a bay sconde. Segun Paskel e tabata sa cu e lo mester bay sera y e no por a atende cu esey.

Hues a bisa cu Camilo tabata recien tata. Paskel a causa un perdida enorme pa e famia. E victima tabata un persona hopi stima den famia. E momento ey tanto e mama como e tata tabata yora.

Hues a bisa cu tin raport di Reclasering cu ta mustra cu Paskel tabata biba cerca su oma pasobra su mama a fayece. E tabata bayendo school. Raport di psycologo y psychiater ta mustra cu e contact cu su tata no tabata bon y cu e morto di su mama a afect’e masha hopi.

Ambos ta haya cu Paskel ta responsabel pa su actonan y door di morto di su mama esaki a pone Paskel den trauma. Paskel a bisa Hues el a pasa den hopi trauma y e kier haya ayudo. Hues a bisa cu tanto Reclasering y Psycologo ta haya cu Paskel mester di ayudo. E ta actua impulsivo sin pensa y despues di haci cos robez e ta bay pensa.

Fiscal a remarca cu e ta mira Paskel no ta mustra cu e ta duele di loke el a haci. Segun Paskel e ta sinti hopi malo pero si ta el a worde mata, kico e ora.

Fiscal a mustra potret di Paskel den KIA caminda el a mustra riba social media un papel cu 10 dilanti Hues ta mihor cu 10 bou tera. Paskel no kier a bisa nada e momento ey. El a bisa Hues cu e ta haci uso di su derecho di silencio.

   DEMANDA:

Hues a bisa cu e homber M.C. cu actualmente ta sera tambe a haci demanda di daño pa algun aparato electronico na balor di 2.025 Florin. Tambe el a exigi daño inmaterial pa e menaza y maltrato. El a demanda 35 mil Florin.

Mama y tata di e victima Camilo a haci demanda di gastonan di entiero y daño inmaterial en total 49.500 Florin.

   EXIGENCIA DI FISCAL:

Fiscal haya legalmente proba cu a horta na Brandweer. A haya esakinan y debolbe na Brandweer. Tambe proba maltrato y menaza di e homber M.C.

Fiscal a bisa cu dia 2 September 2018, Paskel a kita bida di Camilo. E pregunta ta si ta asesinato of mata. Fiscal a bisa cu e no ta haya mucho cla kico tabata emocion di Paskel. E caso aki a causa un impacto grandi pa Aruba. Fiscal a bisa cu e no ta haya ta premedita pero si cu intencional Paskel a hinca mata Camilo.

E pelea a cuminsa entre Camilo y Paskel na Sand Bar y ora cu Paskel a dal Camilo y cu el a cay, e amigonan di Camilo a bay bringa cu Paskel. Fiscal a bisa cu si Paskel a hinca Camilo e momento ey, por papia di defensa propio pasobra tabata 4 contra 1. Pero envez di Paskel bay cas, el a bay pasa na e parking lot di Arawak Gardens unda Camilo a staciona su auto.

El a sali for di e pickup cu un cuchiu y a core bay riba Camilo y a hink’e y core bay.

Fiscal a mustra cu den menos cu 5 minuut cu Paskel a cana bay despues di e pelea y a bolbe den pick up y den menos cu 1 minuut a hinca Camilo. Fiscal ta haya cu e periodo di 6 minuut cu a pasa ta masha cortico pa bisa cu Paskel por a pensa promer cu el a bolbe.

Fiscal a revela cu Paskel a bisa Camilo: “Abo ta bay h… awor”. Fiscal ta haya cu Paskel tabatin intension di mata. El a perfora e pulmon y curazon di Camilo.

   CASTIGO:

Fiscal a mustra cu despues di e hincamento aki, Paskel a bay sconde. Casi 2 luna e tabata scondi. Famia a haci hopi esfuerzo pa asina a logra haya y detene Paskel. Fiscal a remarca cu Paskel ningun momento a pidi famia pordon. El a exigi 12 aña di prison. Pa loke ta demanda di M.C., Fiscal ta haya cu no a argument esaki. El a pidi Hues pa rechaza esaki.

Fiscal a bisa cu e famia di e victima si a argumenta e gastonan di entiero. Daño inmaterial ta mustra cu e mayornan di e victima tabata bou tratamento pa e perdida di nan yiu. Fiscal a pidi Hues pa aproba e demanda di en total 45 mil Florin.

   ABOGADO:

Mr. Lejuez a bisa Hues cu e caso aki ta dificil pa tanto famia di acusado como famia di e victima. Abogado mr. Lejuez ta comparti punto di bista di Fiscal cu no ta premedita. El a bisa cu dia 2 September 2018, Camilo a mira cu Paskel tabata riba parking lot patras di Sand Bar y a bringa.

Ora cu Camilo a dal Paskel na cara, el a perde cabez. Ora cu e otronan a bay yuda Camilo, Paskel a bira mas rabia. El a bay pero a keda cu hopi rabia y bolbe den su auto y a hinca Camilo. Abogad a bisa Hues cu e no ta haya cu Paskel a actua premedita pasobra e no a haya chens pa pensa mes kico tur lo por tabata e consecuencianan di loke el a haci, promer cu el a hinca.

E abogado ta haya cu aki por papia di defensa propio. Door di a worde bati door di 4 persona, el a perde cabez completo. E abogado ta haya cu mester declara Paskel liber of duna castigo hopi mas abao cu loke Fiscal a exigi.

   PIDI PORDON:

Na final, Paskel cu cabez abao sinta a bisa cu loke e bisa no lo por bira e holoshi back. El a pidi dispensa na e famia. No tabata su intension. El a pidi pordon.

Hues a sera tratamento di e caso y a bisa 5 Juli 2019 lo tin sentencia.

- Advertisement -

DUNA COMENTARIO

Please enter your comment!
Please enter your name here