Home Hudicial Diez aña di prison exigi pa Alexander cu a hinca Juraima mata

Diez aña di prison exigi pa Alexander cu a hinca Juraima mata

2268
0
SHARE
- Advertisement -

ORANJESTAD (AAN): E homber Alexander Ras di 22 aña, riba Diabierna mainta a scucha Fiscal exigi 10 aña di prison p’e pasobra Fiscal ta haya cu intencionalmente Alexander a hinca mata Juraima Wouters riba 7 November 2018.

E sospechoso Alexander casi no tabata papia ora cu Hues a haci preguntanan.

   HINCA MATA:

Hues a mustra cu dia 31 Maart 2018 a haya Alexander cu marihuana y cocaina. Hues a bisa cu Alexander a declara na Polis cu dia 7 November 2018 mas o menos 6’or di atardi den Awakatistraat na altura di ex-Kooyman den Avenida Milio Croes, Alexander, Juraima y un homber A. tabata den auto. Juraima a coy schroefdraai y kier a hinca Alexander pero A. a kita man di Juraima.

Alexander a pasa man pa un multitool y a hinca Juraima den su banda. A. a gara Alexander pa e stop. Alexander a sali for di e auto pa e bay y Juraima a coy schroefdraai y bay su tras. E ora ey Alexander a hinca Juraima na pecho robez cu consecuencia fatal.

Hues a bisa cu A. a declara na Polis cu e no tabata den e auto. El a bisa cu el a topa cu e pareha riba caya. Nan tabata discuti y cu Alexander tabatin un multitool den man drechi y a purba hinca. El a purba calma Juraima pero Alexander a hink’e y cana bay. El a hiba Juraima den auto pa hospital pero na caminda Juraima a bisa A. pa bisa su mayornan cu e ta stima nan hopi y despues a fayece.

Hues a bisa cu tin testigonan a bisa cu a mira tres persona den e auto y nan a sali y tabatin discusion. Ora e homber a cana bay y e muher a push’e, e homber a bira y hinca e muher den pecho cu forza.

Hues a bisa cu ningun hende ta bisa cu Juraima tabatin un schroefdraai den su man. Tur ta bisa cu Juraima a dal Alexander. Hues a remarca cu ta Alexander so ta bisa cu Juraima a purba hink’e cu schroefdraaier. Hues a bisa cu patologo a constata cu e cuchiu a perfora e victima su curazon.

   ADICTO NA DROGA:

Hues a mustra cu for di investigacion por compronde cu Alexander ta adicto na marihuana y ta usa pilder pa e calma pa drumi. Juraima tambe ta adicto na marihuana y cocaina y cu ora Juraima usa cocaina e ta bira agresivo.

Hues a mustra cu Alexander a bisa cu e relacion cu Juraima tabata dificil. El a bisa cu Juraima ta bira agresivo ora e usa cocaina.

Tambe el a bisa: “si Juraima dal mi, mi ta dal’e back. Mi no ta tolera hende maltrata mi”. Hues a bisa cu na Polis Alexander a bisa cu Juraima a bisa Alexander cu si e dal’e un biaha mas e lo hink’e y cu Alexander a bisa Juraima wak bon kico e ta bisa. A. a declara na Polis cu e conoce e pareha bon y cu Alexander diferente biaha ta maltrata Juraima y cu un biaha Alexander a kibra Juraima su cashi di wowo.

Hues a bisa cu tin raport psycologo y psychiater. Psycologo ta papia cu tin hopi problema den relacion entre pareha. Alexander tin tendencia di usa agresividad hopi liher pasobra e ta rabia hopi liher. Psycologo a constata depresion y cu e ta scucha stemnan.

   PURBA MATA CURPA:

Ta asina cu Alexander a declara na Polis cu ta duele hopi ora el a tende cu Juraima a fayece. E lamentable incidente aki a keda traha riba dje te cu el a purba mata su curpa pero esaki no a logra. Ta asina cu dia 8 November 2018, Alexander a entrega su mes na Polis. Psychiater a evalua Alexander y a constata cu parce cu tempo cu Alexander tabatin 7 aña, el a haya su omo horca na cabuya y su mannan tabata corta manera e kier a los pero no a logra. Esaki a keda traha riba Alexander. Tanto psycologo como psychiater ta haya cu Alexander ta responsabel pa su actonan.

Hues a mustra cu Alexander tin carchi di castigo caminda e tin condena pa maltrato cu arma. Hues a bisa Alexander cu e ta blo cabez abou y ta sacodi cabez. Hues puntra si Alexander kier bisa kico e ta sinti. Alexander a sacodi cabez mustrando cu e no kier bisa nada.

E famia di e victima a haci un demanda di daño di alrededor di 8 mil Florin.

   EXIGENCIA DI FISCAL:

Fiscal a bisa cu e ta haya proba posecion di marihuana y cocaina. E caso di 7 November 2018 ta un incidente lamentable. Polis a worde informa di e hincamento. 8 November 2018, Alexander ta entrega su mes. Fiscal a bisa cu tin diferente testigo cu a mira con e victima a dal e acusado y despues e acusado a hinca e victima cu cuchiu den pecho.

Patologo a constata un hinca di mas o menos 15 cm cu a perfora pulmon y curazon. Door di hopi sangramento e victima a fayece. E no ta kere cu por papia aki di defensa propio. Ningun hende a mira cu Juraima tabatin un schroefdraai y kier a hinca Alexander. Fiscal ta haya cu Alexander por a cana bay pero dos testigo a mira cu el a bira bay riba e victima. Fiscal ta haya cu Alexander por a pusha e victima pero no a haci esaki.

Fiscal a bisa cu e victima tabatin 34 aña ora cu Alexander a kita su bida. Ningun castigo lo por drecha e sufrimento y dolor cu e famia ta pasa aden. Famia a expresa cu nan a perde un ser hopi keri. Fiscal a exigi 10 aña di prison pa Alexander, teniendo na cuenta cu un biaha caba el a yega di worde condena pa maltrato cu arma. Fiscal a pidi Hues pa aproba e demanda di daño di e famia di e victima.

   DEFENSA ABOGADO:

Mr. Paesch a bisa Hues cu mas cu 3 gram di cocaina y mas cu 9 gram di marihuana a worde haya riba Juraima y no Alexander. Alexander a worde haya cu un grinder. Alexander kier a proteha Juraima y a bisa cu e tabatin droga. E abogado ta haya cu a base di e declara di Alexander so, no por hay’e culpable di e droga.

Pa loke ta e hincamento, e abogado a mustra cu Juraima a bay cu Alexander den auto y tabatin discusion den auto. Tin testigo cu a mira con e victima tabata dal Alexander den cara. Na dado momento Alexander a Sali for di auto y a cuminsa cana bay. Juraima a sali for di auto y a bay tras di Alexander. E abogado ta haya cu Alexander a defende su mes contra Juraima cu tabatin un schroefdraai. E abogado ta haya cu ora Alexander a bisa cu el a defende su mes contra Juraima, Fiscal mester a puntra e testigonan si nan a mira Juraima cu un schroefdraai, pero Fiscal no a haci esaki.

E abogado ta haya cu e homber A. no a bisa e berdad. Tin diferente persona a bisa cu e homber A. y Alexander tabata den e auto. Segun e abogado, e declaracion di A. no ta confiabel. El a bisa cu Alexander no tabatin e intension di mata y tampoco causa herida severo na Juraima. Segun e abogado, Alexander a actua despues cu el a worde maltrata door di Juraima. E abogado ta haya cu no por condena Alexander pa mata. El a bisa cu Alexander ta haci apelacion riba defensa propio. El a señala cu a haya e schroefdraai pero no a haci mas investigacion. Ta door cu Juraima a bay su tras di Alexander y a purba hink’e cu e schroefdraai, Alexander a actua asina pa defende su mes. Hues a sera tratamento di e caso y a bisa 5 Juli 2019 pa 8.15 lo tin sentencia.

 

- Advertisement -

DUNA COMENTARIO

Please enter your comment!
Please enter your name here