Home Enseñanza Docentenan ta riparando cu e palabracionnan cu Minister Lampe a haci no...

Docentenan ta riparando cu e palabracionnan cu Minister Lampe a haci no ta wordo honra

39
0
SHARE
- Advertisement -

Tension ta sigui na SPO y awor atrobe ta wardando ariba contesta di Minister

ORANJESTAD (AAN): Presidente di Sindicato di Maestro (SIMAR) Josephina Albertus a duna di conoce cu tabata tin un reunion na SIMAR hunto cu e docentenan preocupa di SPO, cu presencia di SEPPA, Minister Lampe y tambe Parlamentario Dowers.

E docentenan por a vocifera e preocupacionnan cu nan tin relaciona cu e situacion di SPO pasobra ora cu SIMAR a sinta cu minister na Januari tabata tin e preocupacion unda cu minister kier a haci un di dos scol un scol.

E docentenan no tabata haya esey algo bon pa haci y a traha diferente palabracion cu minister y e docentenan ta riparando cu e palabracionnan cu a wordo haci no ta wordo honra. Nan no tin claridad, Albertus a indica.

Awor tabata un bon momento ora cu a bolbe sinta hunto pa dialoga ariba e situacion. E docentenan a traha un presentacion pa mustra pakico un solo scol no ta bay logra. Ta hopi mucha cu tin extra ‘baggage’ cu nan y ta bay pone nan tur den un edificio cu no ta grandi suficiente pa tur mucha. Falta cosnan cu lo mester pa por duna un enseñanza di calidad, el a agrega.

Pesey a pidi minister pa warda cu esey y duna nan chens den e mesun scol cu nan ta aworaki, cu nan por haci cierto cambio cu lo haci cu nan por draai un les di calidad. Ora cu nan bay hunto na Brazil cu esey no lo por ta posibel.

Tin muchanan cu ta biba na Noord cu lo mester bay te na Brazil. E localnan ta hopi chikito compara cu e cantidad di mucha cu lo tin cu sinta aden.

E lugar na Brazil no ta adecua pa na e momento aki bay hinca den e cantidad di mucha cu tin na SPO, a enfatiza. Ta papiando di muchanan cu mester di mas atencion y por pone maximo 12 mucha den un klas, unda ya caba 14 ta mucho hopi.

Tin varios factor. Tin e factor di grandura di scol, e facilidad di e lokalnan cu no ta grandi suficiente pa tur mucha, entre otro. Tampoco e gebouw na Brazil no tin un gymzaal, pa sigui menciona.

E docentenan kier haya claridad tocante si mester bay ainda den un gebouw, tambe kier claridad pa loke ta e curriculum y banda di esaki a compronde cu na Santa Cruz, e directie no lo tey pa otro aña y nan kier sa si esey ta bay bira un vakature na unda e docentenan por aplica ariba dje.

Minister Lampe a puntra pa dia 21 di Juni pa e tin tempo pa bay bek y check tur su datonan pa asina e por bin bek cu un contesta. E docentenan ta di opinion cu si e minister ta bin bek atrobe y impone algo, e situacion no lo bira mihor, e presidente di SIMAR a laga sa.

SIMAR como SEPPA lo keda pendiente pa asina pa dia 21 di Juni e docentenan haya claridad ariba nan preguntanan.

 

- Advertisement -

DUNA COMENTARIO

Please enter your comment!
Please enter your name here