Falta di personal ta marca relato anual 2018 Contraloria General

    160
    0
    SHARE
    - Advertisement -

    Na un momento cu mas mester di e aparato di control financiero

    *Mita di e puestonan di trabou no ta wordo ocupa actualmente

    *Figura clave den maneho diario di controlado di Aruba ausente

     ORANJESTAD (AAN) — Dia 4 di Juni 2019, e relato anual di Algemene Rekenkamer Aruba pa 2018 a mira luz den un tempo cu a keda demostra cu control ta e exigencia mas grandi. DIARIO a cuminsa studia y analisa e rapport debi na e importancia grandi pa trabounan di control por wordo eherce pa asina sirbi e bienestar di Aruba.

    Algemene Rekenkamer Aruba, cu tambe ta wordo yama Tribunal di Cuenta of Contraloria General di e pais, ta e instancia cu mester determina si gobernantenan ta tene nan mes na reglanan legal pa atende cu placa di Aruba.

    E organo di estado ta eherce control riba tur gasto cu wordo haci y caminda ta necesario ta haci su propio control pa sigura cu bienestar di e pais ta refleha segun ley den gobernacion.

    E relato anual di Algemene Rekenkamer Aruba mes pa 2019 ta motibo pa preocupacion serio debi na e cantidad di puestonan habri hasta den funcion determinante di e Camara y e oficinanan cu ta encarga cu e trabou diario.

    Teniendo cuenta cu e desaroyonan serio na Aruba, den cual rapportnan di Algemene Rekenkamer Aruba mester duna claridad con a atende cu placa di pueblo durante añanan cu a conduci na e crisis severo actual, ta inaceptabel pa hopi tempo pasa prome cu nombra e funcionarionan necesario.

    Pa cuminsa na e camara mes, por nota cu for di januari 2015 e puesto di Presidente di Algemene Rekenkamer Aruba ta spera un funcionario wordo nombra. Mester nombra dos miembro suplente segun e base di trabou di e organo.

    Miembronan di Algemene Rekenkamer ta wordo nombra pa bida largo, pues pa ley te ora nan yega e edad di 70 aña. Miembronan di e camara, e conseho mes, no ta den Servicio di Algemene Rekenkamer pero ta haya un compensacion pa nan trabou banda di nan ocupacion diario.

    Segun e relato, na e momentonan aki ta trata na yena e vacatura pa dos miembro suplento.

    E persona cu sin duda ta central den e trabou di Algemene Rekenkamer ta, e Secretario cu ta dirigi e oficina cu ta encarga cu e trabounan diario.

    Na 2018 e cantidad di persona cu ta traha riba proyectonan di e organo, a baha debi na e hecho cu un lider di proyecto mester a bay forma parti di esfuersonan pa yega na e Oficina pa Integridad.

    Sigur no ta aceptabel pa tin un vacatura pa e Secretario, cu mester dirigi e trabounan diario na ARA.

    E relato ta mustra cu den nombramento di personal e hecho cu esaki ta den man di Minister y e tempo largo pa cubri e caminda pa por nombra un persona den e puesto, ta hunga un papel.

    Segun e relato anual, Algemene Rekenkamer mester por nombra personal na forma autonomo pa e organo di estado. For di 2018 tin un concepto di ley pa regla e autonomia di Algemene Rekenkamer Aruba y na e momentonan aki mester atende esaki cu urgencia.

    Sin duda mester bini un solucion pa e actual problema pa asina Algemene Rekenkamer Aruba por haci e trabou di control cu ta indispensabel pa e bon gobernacion di Aruba.

    - Advertisement -

    DUNA COMENTARIO

    Please enter your comment!
    Please enter your name here