Home Hudicial Fiscal a exigi trabao pa comunidad pa sospechosonan

Fiscal a exigi trabao pa comunidad pa sospechosonan

193
0
SHARE
- Advertisement -

Relaciona cu caso di scuchamento di radio di Polis

ORANJESTAD  (AAN) – Manera DIARIO a publica, ayera mainta Corte den Promer Instancia a trata e caso penal cu Ministerio Publico a cuminsa contra Nelson Cabral de Andrade, Marko Espinoza Cangahuala, Kenneth Rasmijn.

Tratamento di e caso a dura te den oranan di atardi caminda Fiscal a exigi trabao pa comunidad pa e sospechosonan Rasmijn y Marko y Nelson.

Fiscal tambe a exigi 2 luna di prison condicional pa Nelson cu un tempo di prueba di 3 aña. Den e articulo aki DIARIO ta publica e punto di bista di Ministerio Publico. 

EXIGENCIA DI FISCAL

Fiscal a bisa cu un Polis mester ta integro. Tur hende mester por confia den Polis. De vez en cuando cos ta bay malo. No ta tur Polis ta atene su mes cu reglanan. Si Polis ta laga su radio na disposicion di prensa, ta un hecho serio.

Door di esaki ta pone tur investigacion na peliger. Nelson y Marko tabata usa informacionnan cu ta papia riba radio di Polis. Fiscal no ta haya nan culpable di malversacion pero di encubrimento. Fiscal a mustra cu for di investigacion, Rasmijn scondi a facilita Nelson su radio di Polis. Rasmijn tabata traha cu Departamento Integridad y Seguridad.

Investigacion di GPS ta mustra cu e radio aki tabata na un cas den Dakota y no serca Rasmijn of su oficina. Tambe a constata cu ora Rasmijn tabata cu vacacion, e radio aki tabata mobilisa diferente caminda.

Segun Fiscal, Rasmijn den Corte ta bisa cu e ta haya straño tur esaki pasobra e tabata cu su radio. Na opinion di Fiscal, e hecho cu a haya e radio na e cas di mayornan di Marko, ta mustra cu e indicacionnan di GPS ta corecto.

Fiscal a mustra cu Marko a admiti di a haya radio di Polis for di Nelson. Marko tambe a bisa cu el a hiba e radio pa Rasmijn riba instruccion di Nelson. Marko a bisa cu e tabata haci loke Nelson bis’e.  Polis a haya e cargador di e radio na cas di mayornan di Marko na December 2017.

Durante cu Marko a wordo deteni, D.J. a bay busca e radio. D.J. tambe a declara na Polis cu el a busca e radio. Na 2018, Nelson y Marko a bay traha cu radio di patruya di Polis. Lucho tambe a bisa con tur cos a bay. Fiscal a sigui bisa cu Rasmijn y Nelson ta desmenti.

Rasmijn a bisa cu Nelson a pidi’e pa e haya su radio pero e no a haci. Fiscal a remarca cu Rasmijn no a of no kier a bisa con su radio a bay serca mayornan di Marko. Notabel ta cu ningun momento Rasmijn a bisa cu el a perde su radio.

Fiscal a mustra cu Nelson no kier a bisa nada.  El a haya tur oportunidad di bisa tur cos pero el a nenga di papia. Na opinion di Fiscal, Nelson ta bisa cu e no por papia como periodista pasobra e lo haya problema. E no kier divulga su fuente. Pero esey no tabata loke Landsrecherche a puntra sino su participacion den e usamento di radio di Polis.

Fiscal a sigui bisa cu Nelson ta papia di persecusion politico. El a bay den huelga di hamber. Segun Fiscal, no ta asina cu ta persecusion politico. Ta a base di e investigacion el a wordo deteni como sospechoso.

Fiscal a mustra cu Nelson a menaza di pone potret di miembronan di Landsrecherche den publicidad. Fiscal ta lamenta e actitud baho aki. El a conclui cu Nelson kier haya atencion.

Fiscal a conclui cu Rasmijn a facilita su radio na Nelson y Marko. Rasmijn, un empleado di Gobierno, sin permiso di su hefe, a facilita radio na Nelson.

Esaki ta malversacion di radio di Polis cu ta algo hopi serio. Nelson tabata esun cu a bin cu e iniciativo pa usa radio di Polis. E mester tabata sa cu e radio di Polis ta solamente pa agentenan di Polis.

Marko a bisa cu Nelson a bis’e pa bay poco poco cu e radio pa ningun hende sa cu tin e radio. Despues a bay usa un radio di patruya di Polis. Lucho a bisa cu ta Nelson a pidi pa usa un radio mobil di Polis y Marko a instala e sistema. E ta castigabel pa scucha den forma ilegal combersacionnan di Polis.

Esaki ta tap telecomunicacion. Esey ta loke Nelson y Marko a haci. Usa via computer cu sistema Celos pa scucha combersacionnan di Polis y manda esaki pa esnan cu ta traha cu Nelson. 

EXIGI CASTIGO

Fiscal a exigi pa Rasmijn 240 ora di trabou y si e no haci esaki, e lo mester bay 120 dia di prison. Fiscal a bisa cu probablemente Rasmijn lo no ta traha mas como Polis. Pa Nelson, Fiscal ta haya cu mester duna castigo condicional.

El a exigi 240 ora di trabou pa comunidad y si no haci esaki e lo mester bay 120 dia di prison. Tambe Fiscal a exigi 2 luna di prison cu un tempo di prueba di 3 aña. Pa Marko, Fiscal a exigi 180 ora di trabou pa comunidad of 90 dia sera.

Hues despues di a scucha defensa di abogadonan mr. Lejuez cu a representa Nelson y Marko, mr. Illes cu a representa Rasmijn, a sera tratamento di e caso y a bisa cu dia 15 di Juli 2019 tin sentencia.

- Advertisement -

DUNA COMENTARIO

Please enter your comment!
Please enter your name here