Fundacion Lisette Gomez y mayornan ta frustra, tristo, decepciona y rabia cu veredicto

    316
    0
    SHARE
    - Advertisement -

    Huez a duda riba palabra di mucha cu a wordo abusa:

    ORANJESTAD (AAN) – Fundacion Lisette Gomez y e mayornan di e criatura cu a declara den Corte, despues di a conta su mama e hecho, cu e meneer di e lugar di cuido unda e ta bay, (cu ademas ta meneer di musica), a mishi cu su e partinan priva di su curpa, ta sumamente decepciona, tristo y rabia, pasobra e mucha su palabra ta bal cero pa e Huez.

    Ta trata di un mucha cu a wordo siña for di chikito kico ta abuso sexual di mucha y con pa cuida su mes, y pesey e mesun dia di e sucedido el a conta su mama kico a pasa cune, y Diahuebs mainta Huez a duna veredicto cu no tin suficiente prueba cu e meneer ey a mishi cu e criatura.

    E pregunta den pueblo ta na unda e derechonan di mucha ta keda. Den e caso aki e mucha no por tin testigo, tampoco prueba pasobra si no tin penetracion, y e casonan di mishimento ta keda dificil na Aruba y esaki ta hopi frustrante.

    Lisette Gomes, den un entrevista ta señala cu e mayornan ta hopi decepciona, cu hopi dolor y masha tristo pasobra nan ta kere nan yiu, anto un Huez ta bisa cu e palabra di e mucha no tin suficiente peso pa condena e mucha aki.

    Ta trata aki di un Huez Arubiano, sra. Gomez a menciona. Loke nan mas ta lamenta ta cu nan a bay Corte tres biaha cu e mesun caso aki, y nan tin e pregunta pakico si no tabata tin suficiente prueba, a pone anto e mayornan bin Corte atrobe.

    Nan a sinta den e mesun sala cu e persona cu nan a confia nan yiu pa mas cu seis aña cu e mucha a bay na e scol aki, pa Huez bisa cu e sospechoso a declara cu e no a comete e mishimento pero den Corte luna pasa, el a declara cu por ta door di kishikimento e por a mishi cu e mucha.

    Gomez ta puntra su mes, un homber riba 65 aña di edad cu ta bisa cu “di baina e ta na scol” anto ki mishi ta kishiki un mucha di seis aña. E no ta cuadra. Di un banda e ta bisa cu e no ta na scol, pero e ta biba eynan. Pues, el a contradeci su mes na varios occasion den Corte, anto pa despues Huez bisa toch cu e no a acepta y cu no tin suficiente prueba pa dune un castigo tampoco!

    Sra. Gomez a indica cu e homber a declara cu e ta pasa den camber di e muchanan cu otro hende ta cuida, pa e bay su camber, y e ta puntra si e scol aki ta bolbe habri, lo tin mayornan cu lo hiba nan yiunan aki? E ta duda!

    E homber a cera su scol pasobra mayornan a haya sa di kico e ta wordo acusa y mayoria a kita nan yiunan di eynan.

    Otro aspecto cu a laga di desea ta e investigacion di KZP, y e Huez mes a menciona cu nan no a bay scol pa wak e situacion con e cambernan ta, no a papia cu e leidster pa wak si e homber enberdad no teynan, of cuanto ora e ta bay pa dia pa wak si enberdad ta cuadra cu loke e homber a declara.

    Vooral e temporada di November cu e caso a sosode, cu e meneer a bisa cu e casi no ta bay e cas pasobra e ta bezig cu gaita pues, e tabata tin tur manera di tapa su mes.

    E persona aki ta duna e muchanan les un biaha pa siman y sra. Gomez ta bolbe puntra ta ki confianza e homber aki di 65 aña tin, pa mishi cu un mucha chikito di diez aña.

    Mayornan ta kere nan yiu, pasobra si nan no kere den dje ta ken anto? Sra. Gomes a menciona cu e mama a hiba su yiu cerca un psicologo den exterior y a bin sali afo cu e homber aki tabata prepara e mucha aki, pa yega asina leu di abusa di dje.

    E homber a acepta den Corte cu e tabata yama e criatura “su casa chikito”. Apesar cu tin hopi señal e homber a haya su libertad Diahuebs, locual ta hopi frustrante pa e famia y pa e fundacion cu ta sigui den su lucha contra abuso di mucha!

     

     

    - Advertisement -

    DUNA COMENTARIO

    Please enter your comment!
    Please enter your name here