Home Salud Fundacion pro Persona cu Dislexia cu anochinan informativo na MFAnan

Fundacion pro Persona cu Dislexia cu anochinan informativo na MFAnan

20
0
SHARE
- Advertisement -

Dislexia y discalculia; ki sorto di trastorno nan ta?

ORANJESTAD (AAN):  Hopi biaha mayor ta puntra nan mes dicon nan yiu tin problema na scol pa siña. Semper nan ta haya e contesta cu sea e yiu ta floho of demotiva of, simplemente, cu e no por siña. Pero loke realmente ta e problema mayoria di biaha nunca e mayor no ta haya sa.

E poconan cu, tal bes, si ta haya sa, ta bin tende di cierto causa cu nan ta defini cu un palabra cu ta basta desconoci pa nan: “Dislexia” y tambe un otro palabra: “Discalculia”. Pero, kico esaki ta nifica y kico nan mester haci awo?

Pa algun mayor esaki ta bira un problema grandi, pasobra hopi mayor no sa kico exactamente mester haci den un situacion asina. Mayoria di biaha e scolnan no ta prepara pa esaki tampoco y nan no ta dispone ni di e informacion ni di e material pa por duna un guia na e alumno (nan) cu ta sufri un of ambos defecto. Consecuentemente, e alumno ta cay atras den su lesnan y den su siñansa.

Kico ta nifica ora un persona tin dislexia of discalculia? Esaki ta nifica simplemente cu e persona ey ta siña cos di manera diferente, pero esey no kiermen cu e persona ey tin un inteligencia (mas) abou.

Hopi biaha e personanan aki ta sumamente inteligente, pero nan ta observa, mira y sina cos na un manera diferente. Pa tal motibo tanto maestro, scol como e autoridadnan competente mester ta prepara y ekipa pa duna e personanan aki miho acogida y amparo posibel.
Fundacion pro Persona cu Dislexia ta un fundacion cu a keda lanta dia 21 di februari 2013 door di un grupo di persona preocupa cu e problematica di dislexia y discalculia aki na Aruba.

E obhetivo principal di Fundacion pro Persona cu Dislexia ta: Salvaguardia e derechonan di persona cu dislexia (trastorno cu lesamento) y/of discalculia (trastorno cu rekmento) en particular y di persona cu discapacidad en general den comunidad Arubiano y otro caminda, den e sentido mas amplio di e palabra. Tambe salvaguardia tur loke ta relaciona directamente of indirectamente cu un ke otro of cu por ta beneficioso pa logra el objetivo (meta), den e sentido mas amplio di e palabra.
Con un mayor of tutor por sa si su yiu(nan) tin dislexia of discalculia? Tin varios cos cu por duna indicacion de problema aki.

Roraima Arends, miembro di e fundacion y mama di un mucha cu tin dislexia a duna di conoce cu pa por haya mas informacion tocante e topico aki Fundacion pro Persona cu Dislexia ta invita tur hende interesa, particularmente esnan cu ta pensa cu nan mes of cu nan yiu(nan) (por) tin dislexia y/of discalculia, na anochinan informativo na e MFAnan pa 7:00 or, respectivamente Paradera 27 di juni, Savaneta 2 di juli, Noord 4 di juli y Santa Cruz 9 di juli. Na San Nicolas lo ta 11 di juli y localidad ta keda pendiente.

Durante e anochinan aki lo presenta e miembronan di e directiva actual di e Fundacion, cu a pone como meta nan dilanti traha pa tur persona cu (por) tin dislexia y/of dyscalculia, particularmente traha conhuntamente cu e mayornan cu nan yiu tin problema pa siña (pa via di dislexia y/of discalculia) y yuda tanto e mayornan como otro persona interesa cu mas informacion posibel tocante e dos trastornonan aki.

Ta e mayornan ta esnan cu tin den nan man e futuro di nan yiu(nan). Cu pasenshi y bon guia nan por yuda nan yiu pa ta mas sigur di su mes. Un bon contacto cu scol y siñamento encuanto e parti di enseñansa aki ta yuda nan, como mayor, contribui na e conocimiento academico di nan yiu (nan). Tur mayor, docente y pueblo en general ta wordo cordialmente invita pa asisti name anochinan informativo menciona.

 

- Advertisement -

DUNA COMENTARIO

Please enter your comment!
Please enter your name here