Home Turismo Glennie Tromp a cumpli 40 aña di servicio na Aruba Tourism Authority

Glennie Tromp a cumpli 40 aña di servicio na Aruba Tourism Authority

120
0
SHARE
- Advertisement -

ORANJESTAD (AAN)  –  Dialuna, 11 di juni, Oficina di Turismo a celebra 40 aña di servicio di Glennie Tromp. Glennie, ta e persona cu mas hopi aña di servicio na oficina di A.T.A.

CARERA

Na aña 1979, Glennie a inicia su carera na Algemene Dienst y despues a haya e oportunidad pa traha cu QEPD, Sr. Betico F. Croes. Glennie ta conta cu esaki sigur tabata un parti importante den su bida, mirando cu den e etapa aki su desaroyo profesional, esta su pasion pa sirbi pais Aruba a nace y te dia di awe, ta su fuente di inspiracion pa sigui traha pa nos destinacion.

Trahando den diferente departamento di e industria di turismo, Glennie a experencia e cambionan clave di turismo di Aruba. Na aña 1987 Aruba Tourism Authority tawata carga e nomber di Toeristen Bureau, unda Glennie a traha den e departamento di ‘Public Relations’.

Despues di esaki el a sigui su carera den e departamento di ‘Marketing’, como ‘Liaison’ di Europa. Na aña 2002, Glennie a traha hunto cu Minister di Turismo y Transporte y na aña 2008 el a biaha bay Hulanda pa traha pa e mercado di Spaña y Italia. Na aña 2011 Glennie a bolbe bek Aruba pa sigui na Aruba Tourism Authority como ‘Marketing Executive’.

UN EHEMPEL DI PERSEVERANCIA, AMABILIDAD Y PROFESIONALISMO

Durante palabranan di elogio Ronella Tjin Asjoe-Croes, CEO di A.T.A. a indica cu “E exito di Aruba su turismo ta grandemente mara na Bo persona. Bo ta para pa exelencia y no ta acepta menos. Bo ta keda reta Bo mes y keda sigura cu A.T.A. y Aruba ta sigui presenta cosnan nobo y diferente. E spirito di innovacion ta parti di ken Bo ta. E experiencia y sabiduria cu Bo tin, Bo ta pasa pa hobennan y otronan tambe. Glennie sigur ta un di e miembronan   ‘clave’ y ‘esencial’ di e ekipo di A.T.A. Danki! Danki pa 40 aña di dedicacion, y sigur di sacrificio tambe. PABIEN! Hopi bendicion!”

Glennie semper ta cla pa yuda su coleganan y semper a surgi como mentor pa esnan mas hoben cu ta bin haci nan pasantia dentro di A.T.A. Su pasion pa Aruba y su trabou a wordo subraya pa ‘hopi’ e siman aki y ta di admira. Glennie ta un di e personanan cu te cu dia di awe ta masha conecta cu hopi den e industria di ‘General Managers’ di hotelnan te cu ehecutivonan di tur tempo y esnan nobo. Sin papia di esnan cu ta den e industria di turismo internacionalmente. Esaki ta un di e fortalezanan di Glennie, su contactonan y curashi pa yega unda mester yega pa ‘get the job done!’ CMO di A.T.A., Sanju Luidens-Daryanani, como tambe Jerusha Rasmijn, Manager di Aruba Convention Bureau y un colega di hopi aña a subraya esaki.

Di parti Oficina di Turismo, danki pa 40 aña di dedicacion, pasion y profesionalismo! Ta un honor di por traha banda di Glennie Tromp, un persona ehemplar pa e oficina, pa turismo y pa nos comunidad. Pabien!

- Advertisement -

DUNA COMENTARIO

Please enter your comment!
Please enter your name here