Mientras cu Nelson Andrade no kier bisa nada y agente Rasmijn ta desmenti di a duna radio
ORANJESTAD (AAN) – Ayera mainta te den oranan di atardi, a tuma lugar tratamento di e caso penal cu Ministerio Publico a cuminsa contra Nelson Cabral de Andrade, Marko Espinoza Cangahuala, Kenneth Rasmijn. Den e articulo aki, DIARIO ta publica e interogacion di Hues na e sospechosonan.
Fiscal a bisa cu Rasmijn ta wordo acusa cu entre 1 Januari 2015 y 1 November 2018, a malversa un radio di Polis. Segun Fiscal, Rasmijn, trahando den Departamento Integridad y Seguridad di Polis, a malversa e radio di Polis.
Pa loke ta Nelson y Marko, Fiscal ta acusa nan cu entre 1 Januari 2015 y 1 November 2018, nan tabata complice di malversacion di radio di Polis. Tambe cu a malversa un radio di patruya di Polis. Fiscal a bisa cu Nelson y Marko tabata scucha, tap, combersacionnan di Polis, usa computer y bay riba frequencia di Polis y manda esaki pa mas coleganan di prensa.
Fiscal a bisa cu e sospechoso Lucho Werleman, kende ta esun cu a prepara e radio di patruya di Polis, via su abogado a bisa cu Nelson a pidi’e y Nelson hunto cu Marko a bay cerca dje y Marko a instala e Celo Network. Ta asina cu Werleman ta un mecanico di Polis y den su garashi e tabatin algun patruya.
Na su cas e tabatin e radio di patruya. Fiscal a bisa cu Werleman a haya 100 ora di servicio pa comunidad y e caso contra ta dje ta cla. Fiscal a bisa cu a cuminsa investigacion Kinikini riba radio di Polis. Tin mas investigacion Kinikini 2 y e sospechosonan lo bin dilanti despues di receso. Aki tambe tin un agente di Polis envolvi.
USA RADIO DI POLIS
Hues a bisa cu segun relato di Polis, a base di informacion anonimo cu tin un radio di Polis den man di prensa, a cuminsa investigacion. No tabatin denuncia di radio di Polis perdi pero e radio cu a haya ta di Rasmijn.
Ta asina cu investigacion a mustra cu ora e radio ta sendi e ta manda un señal for di cas di mayornan di Marko na Dakota. Na December 2015 e radio aki a wordo duna na Rasmijn. Na Maart 2018, Rasmijn a notifica cu el a perde e cargado di e radio di Polis. Ta asina cu a haya e cargado aki na cas di mayornan di Marko.
Hues a bisa cu Polis a interoga Rasmijn con por ta posibel cu e radio cu e tin, ta na cas di mayornan di Marko. Segun Rasmijn, e tabatin e radio cun’e y tabata us’e na oficina y na cas.
Hues a bisa cu investigacion ta mustra cu Rasmijn no a usa e radio. No a capta señal for di su cas y tampoco oficina. Segun Rasmijn, esaki no ta cuadra. E tabatin e radio na su cas y no ta compronde cu e señal ta bin for cas di mayornan di Marko. Polis a remarca cu ora cu Rasmijn tabata cu vacacion, e radio tabata cendi na e cas di mayornan di Marko.
Hues a mustra cu Marko a admiti cu e radio tabata den cas di su mayornan. El a bisa cu el a haya e radio for di su hefe Nelson. El a bisa cu Nelson a bis’e pa no bay den publico cu e radio. El a bisa cu el a haci aplicacion pa otronan por scucha. El a bisa cu na Januari 2018 el a hib’a e radio riba orden di Nelson pa Rasmijn.
A haci investigacion na cas di mayornan di Marko y a haya un radio di Polis. Rasmijn ta para riba cu e no a duna Nelson radio y no a haya radio bek di Marko na Januari 2018. Rasmijn a admiti cu hopi biaha Nelson ta pidi’e pa radio pero e no a duna. El a bisa cu ta hopi Polis ta wordo acerca door di prensa pa informacion y radio. Hues a mustra cu na December 2017 a haya e cargador di e radio di Polis di Rasmijn na cas di mayornan di Marko.
Hues a remarca cu 3 luna promer cu Rasmijn a bisa cu el a perde e cargador, esaki a wordo haya na cas di mayornan di Marko.
Hues a puntra Nelson si e tabatin e radio di Polis. Segun Nelson nunca el a haya radio di Rasmijn. Nelson a bisa cu e no ta divulga ningun fuente pasobra esey ta fin di su trabao. Nelson a bisa cu e no ta bisa nada y cu su abogado lo papia tur cos detaya.
Hues a mustra cu for investigacion ta sali na cla cu e señalnan tabata sali for di cas di mayornan di Marko y Marko tabata traha pa Nelson. Marko a bisa cu Nelson a dun’e e radio di Polis y Marko a usa Celo Network pa asina transmiti pa esnan cu traha pa 24 ora. Te cu Januari 2018 el a traha cu e radio y riba orden di Nelson, el a hiba e radio bek pa Rasmijn.
USA RADIO MOBIL DI POLIS
Hues a mustra cu Lucho Werleman y Marko a wordo interoga relaciona cu usamento di radio di patruya di Polis. Nelson a bisa Lucho pa laga Marko usa aplicacion Celo Network. Ta asina cu Lucho ta un mecanico di Polis caminda tabatin autonan di Polis para. Esaki sosode despues cu nan no tabatin e radio mas. Segun Marko, riba instruccion di Nelson a bay instala e network na cas di Lucho.
Nelson a bisa pa no bisa otronan. For di e cas di Lucho tabata scucha combersacion di Polis. Lucho a bisa cu Nelson a acerk’e pa haci esaki y Marko a haci’e pa scucha informacionnan di Polis. Lucho a bisa cu November 2018, Nelson a yam’e. Lucho a mustra Polis cu den un container na su garashi e tabatin e radio di patruya di Polis cu e computer cu Marko a prepara.
TAP COMBERSACION
Hues a mustra cu Polis a tap cellular di Marko caminda e ta papia cu Nelson diferente biaha na September 2018. Durante e combersacionnan por a scucha con e radio di Polis tabata papia den background. Marko a bisa cu esey ta e aplicacion Celo Network.
Tambe a scucha combersacion di Nelson y Marko caminda Nelson ta reclama cu no por scucha informacion di Polis for di garashi di Lucho. Marko mester a bay na cas di Lucho pa drecha e sistema. Despues cu Hues a confronta Nelson cu tur esakinan, Nelson a bisa cu e no tin nada di bisa.
FISCAL
Fiscal a bisa cu e tin preguntanan pa Nelson pero door cu e no kier bisa nada e no ta haci preguntanan. Fiscal a haci Marko preguntanan entre otro cu Marko lo a bisa cu el a wordo presiona door di Landsrecherche. Segun Marko, Landsrecherche lo a bis’e cu su mama lo por wordo saca. Marko a bisa cu e ta mantene e declaracion cu el a haci na Landsrecherche.
Hues a bisa cu Marko a declara na Landsrecherche cu el a bisa e berdad pero e no ta sinti’e sigur pasobra el a declara contra un agente di Polis. Hues a remarca cu ningun caminda e ta lesa cu Marko ta bisa cu el a wordo presiona. Hues kier haya un aclaracion riba esaki. Marco no a bisa nada mas.
Pa loke ta e situacion di Rasmijn na trabou, el a bisa cu el a haya prohibicion pa drenta oficina. Despues di algun luna el a bay trabou pero Comisario a mand’e cas bek. El a bisa cu despues el a haya suspension. El a bisa Hues cu esaki ta traha masha hopi mes riba dje. Su abogado mr. Illes a bisa cu mando di Polis a manda un carta mustrando cu lo bay cuminsa un procedura pa kita Rasmijn.
