Un di e ganadornan di ‘Pitch Time’
ORANJESTAD (AAN): Dialuna atardi, Heart-Centered Leadership Foundation a tene un conferencia di prensa unda Keyla Rojas, Project Coordinator di e fundacion a duna di conoce cu nan a lanta na 2008 cu e meta pa empodera hobennan.
Nan tin training y programanan , ‘after-school programs’ y guianan individual pa e hobennan y ta yuda nan traha ariba nan desaroyo personal.
Nan ta kere den un generacion di hoben cu ta representa 3R’s: Respetuoso, Responsabel y Resilente. “Locual cu nan por encontra den bida, nan ta keda para firme den nan zapato”, Rojas a expresa.
E motibo di e conferencia di prensa tabata pa anuncia un seminario cu e fundacion ta bay tin den Augustus specialmente pa hoben cu yama ‘Impact Camp’. Esaki lo ta un programa di tres dia pa hobennan entre 15 y 21 aña.
E prome ‘Impact Camp’ cu nan ta haci lo ta un ACE Program. Esaki ta para pa ‘Achievement’, ‘Commitment’ and ‘Excellence’. E ultimo 7 añanan nan a traha cu un fundacion na Merca hopi di cerca y a ofrece e ACE Program aki na hopi scol secundario na Aruba exitosamente, a bisa.
E biaha aki, despues cu hopi mayor a puntra pa nan otro yiunan experencia un ACE Program, nan a dicidi di organic’e di un manera habri cu un cupo pa 100 hoben.
Na otro banda, Ashna Thijsen, Youth Coordinator a duna di conoce cu esaki lo ta un seminario hopi interactivo, divertido. Lo traha ariba desaroyo personal, autoestima, balor, amor propio, hermentnan cu e participantenan mester den nan bida pa asina por sigui desaroya den nan trayecto di bida.
Esaki ta posibel danki na e proyecto di “Pitch Time”, cual nan a participa den dje. Nan tabata un di e proyectonan ganador. Nan ta haci nan ‘Impact Camp’ den colaboracion cu Marriott Hotel, Thijsen a laga sa.
E ‘Impact Camp’ lo ta entre 9 am – 4:30 pm di 9 pa 11 di Augustus. E ta bay ta na Marriott y lo cobra un suma pa participa cu posibilidad di paga den dos pago, a indica.
E camp ta dirigi na hobennan di 15 pa 21 aña interesa den e tema. Tin hobennan mas jong cu ta interesa den participa y tambe lo tene cuenta cu nan, a señala.
Pa mas informacion por bishita nan Facebook Page: Heart-Centered Leadership Foundation.
Nathan Tromp, Youth Volunteer a indica cu pa por papia di e Pitch Time e mester a bay e seminario aki di tres dia y por bisa cu e ta yuda.
“E ta traha mas tanto ariba e motivacion, self-confidence, con pa yuda otro, yuda bo mes. Si bo kier haci un impacto registra. Mi kier invita tur hoben cu lo kier haci impacto pa nan mes y pa otro, registra”.
