Huicio di Grupo Maduro contra nucleo cu a trece Citgo Aruba

    339
    0
    SHARE
    - Advertisement -

    Mientras na Merca tin peticion pa hiba Nicolas Maduro dilanti Hues

    *Acusacion a base placa pa prestamo cu Citgo como borg 2014 y 2015

    *PDVSA ta habri oficina na Rusia cu ta cla pa uza su borg den Citgo

    ORANJESTAD (AAN):  Mientras Aruba tabata puntra su mes si e proyecto Citgo lo a bira realidad, na Merca investigacionnan importante tabata tuma luga a base di actonan criminal cu tabata tuma luga den Citgo. DIARIO a tene pueblo di Aruba informa y prepara pa scandal cu ta crece den tamaño mientras e momento di desenlace di Citgo ta yega cada rato mas cerca.

    Documentonan den Corte na Merca ta papia un palabra cla y ta parce cu regimen Maduro tambe ta realisa cu no por sconde berdad pa mucho tempo mas.

    For di 2017, Nicolas Maduro a pidi un grupo di persona cu tabata di su agrado den Citgo y cu e tabata sa cu tabata comete actonan fraudulento y di corupcion den Citgo, pa asisti na un reunion.

    Den e grupo aki tabata tin personanan cu continuamente tabata na Aruba y hasta tabata instrumentonan pa logra e acuerdo entre Citgo y Aruba.

    Siman pasa, na momento cu situacion mundial ta culmina, Nicolas Maduro a anuncia cu e luna aki e oficina cu el a cera na Portugal a base di investigacionnan cu husticia na paisnan Europeo ta conduci contra actonan criminal den PDVSA, lo habri porta na Rusia.

    Ta conoci cu Rusia tin interes grandi den Venezuela pero tambe directamente den Citgo cu pa casi mita ta den man di Rusia pa medio di borg, cu awor por cambia den participacion directo di Rusia den Citgo.

    Mientras Juan Guaidó ta avansa y ta haya control di mas propiedad di PDVSA na mundo liber, regimen Maduro ta core riesgo di termina den prizon si investigacion na Merca continua.

    Diabierna e Corte di Husticia di Venezuela cu Nicolas Maduro ta controla, a anuncia cu el a dicidi cu ta bay persigui e grupo di personal di Citgo cu nan a detene na 2017.

    Uno di nan Nelson Martinez awor ta difunto y no por defende su mes mas ni acusa Nicolas Maduro. E ta uno di e grupo di persona cu tabata directamente envolvi cu Citgo y Aruba y den e caso aki mester presenta dilanti di Hues,

    DIARIO ta den posesion di un comunicado di e “Juzgado Tercero en funciones de Control de la Circunscripcion Judicial Penal del Area Metropolitana de Caracas, manera e documento ta splica.

    E tribunal a mustra cu ta mantene e siguiente grupo deteni y awor ta hiba nan caso dilanti Hues na Venezuela.

    Ta trata di e siguiente personanan: José Ángel Pereira Ruimwtk, Tomeu Vadell Recalde, Alirio Zambrano, Jorge Toledo, Gustavo Cardenas y José Luis Zambrano manera e nombernan  ta aparece den e documento oficial cu ta den poder di DIARIO.

    Nan ta wordo acusa di ladronicia, laso ilegal cu contratista, uzo di placa contra interes di Venezuela, e patrimonio publico y di Citgo como filial di e empresa Citgo.

    Diabierna tabata tin e audiencia preliminar y Hues a dicidi cu e admiti e totalidad di acusacion di e Ministerio Publico di regimen Maduro contra e ciudadanonan Venezolano.

    Interesante ta, cu e acusacion di Nicolas Maduro no ta basa riba loke e ex empleada Marisol Gomez a ilustra den e caso contra Citgo na Merca pero riba wega cu e grupo lo a hunga pa haya financiamento internacional di FrontierGroup Management LTD y Apolo Global Management.

    E acusacion ta, cu e grupo cu tabata den union cu Maduro, na cierto punto lo a bay busca riba su mes financiamento pa gobernacion di Chavez cu Citgo como borg mientras Maduro a dicidi pa otro grupo.

    Segun e acusacion nan no a tene cuenta cu e pensamento di Nicolas Maduro y a ofrece condicionnan desfaborabel y a ofrece como garantia Citgo sin consulta cu Nicolas Maduro.

    Mientras nan a haci esaki, Nicolas Maduro mes a hipoteca Maduro na otro compania cu awor mester paga of perde Citgo.

    Segun e comunicado di tribunal di Venezuela, e investiga a wordo haci despues di e ricibi orden di e Contrainteligencia Militar (Dgcim) cu a determina cu e iregularidad a tuma luga.

     

    - Advertisement -

    DUNA COMENTARIO

    Please enter your comment!
    Please enter your name here