Home General Indexering empleadonan gobierno for di cartera di e pober?

Indexering empleadonan gobierno for di cartera di e pober?

334
0
SHARE
- Advertisement -

Analisis

DIARIO ta consulta cifranan y rapportnan

Cuanto hende pober tin na Aruba? No bini cu cifra oficial cu ta papia di pobresa como algo limita na un grupito cu ta biba den miseria total pa un cantidad di motibo.

Ora nos ta papia di pober na Aruba den e situacion actual, nos ta papia di un parti grandi di pueblo, cu tin miedo di dal un betro, disfruta di un chuculati, bebe un refresco pasobra placa a bira scars den cartera.

Peso di bida a cay cu tur su forsa riba Aruba, cu mester mira con e ta sobrevivi. Henter Aruba, incluso comerciantenan mester haci sacrificio pa asina nan por supera e problemanan serio cu e situacion financiero serio di e pais ta representa.

Ta increibel cu den e situacion actual, empleadonan publico ta exigi e pueblo di Aruba pa duna nan mas placa fin di luna.

Pa yega na un conclusion si e empleadonan di gobierno mester haya indexering, DIARIO a bay consulta cifranan oficial di e pais. DIARIO a bolbe na rapportnan oficial cu ta mustra kico a pasa cu placa di Aruba,  di e Arubiano cu ta paga belasting pa e pais funciona.

Den e cuenta anual di 2017 di e pais Aruba, ta topa cu tur splicacion cu mester pa puntra si Aruba mester hinca su cabes den e cabuya di horca pa por paga empleadonan publico un indexering.

Ora mira presentacionnan di exigencia y e forma cu cierto asuntonan ta wordo treci dilanti, ta mira con atrobe wega politica barata ta haya expresion.

Den medionan di comunidad no ta papia di e posibilidad cu tin pa papia di indexering pero ta bay ataca e partido di gobierno cu den pasado lo no kier a paga indexering.

E conclusion cu ta duna motibo pa mas contesta ta, cu atrobe politica ta wordo haci mientras Aruba ta den un situacion financiero y desastroso cu tur hende ta na haltura a wordo ocasiona dor di un partido cu a kibra e base economico y financiero di Aruba.

DIARIO ta uza cifranan pa defende e Arubiano pober cu mester paga belasting pa asina paga indexering na empleadonan publico mientras den sector priva cu no ta abusa di placa di belasting no ta papia mes di indexering.

Den e cuenta anual di 2017, Algemene Rekenkamer Aruba ta mustra cu e maneho cu gobierno anterior a hiba di 2014-2017, a crea un situacion cu lo exigi pa medida wordo tuma pa por evita cu Aruba no ta gubernamental riba tereno financiero.

Den e cuenta anual por mira con grandi e parti cu ta bay na trahadonan di gobierno tabata na 2017 y cu un aumento lo a haci e crisis di 2018 mas serio.

Laga nos no gaña otro. Tin empleado publico cu ta necesario. Pero sigur cu e gobierno anterior cu a hunga wega politico cu BBO, cu Bo Aruba y te awe tin nos ta baila den huma di refineria, tabata tin un maneho politico partidario cu fondonan publico.

Lo ta husto pa den e situacion actual duna indexering na personal di gobierno cu tin areglonan cu gobierno so ta dispuesto pa paga pasobra e no ta sali for di cartera di e ministronan pero di pueblo?

Ta husto pa na e momentonan aki cu Aruba mester lucha pa tene cabes riba awa, atrobe bini exigencia pa mas placa di parti tambe di un grupo di personal di gobierno cu ta traha den puestonan cu solamente politica por a entrega su amigonan?

Na e momentonan aki den sector priva, e pregunta grandi ta cuanto hende tin trabou garantisa. Den sector di gobierno,  politico cu awe ta sconde tras di barica pa pafo di Parlamento e instiga pueblo, e empleado di gobierno tin trabou super garantisa. Pasobra hasta ora declara Aruba bancarota, empleadonan di gobierno lo haya placa di un pueblo cu politica barata a haci pober.

- Advertisement -

DUNA COMENTARIO

Please enter your comment!
Please enter your name here