Home Comercio KvK ta enfatiza cu comunidad comercial no ta contento cu decision pa...

KvK ta enfatiza cu comunidad comercial no ta contento cu decision pa kita BBO for di recibo

46
0
SHARE
- Advertisement -

ORANJESTAD (AAN): Camara di Comercio y Industria (KvK) a tuma nota riba e comunicado di Gobierno di Aruba caminda cu Minister Xiomara Ruiz-Maduro a indica cu ciudadano y negociantenan ta contento cu BBO/BAZV y BAVP lo no aparece mas riba recibo.

Segun presidente di KvK, Kawish Misier, e punto aki sigur no ta cuadra cu loke e gremionan comercial den nomber di e comerciantenan local di tur sector di nos economia ta bogando pe pa lunas caba. A dirigi un carta pa Gobierno y Parlamento for di December caba encuanto e topico aki.

E comerciante contrario na e ponencia di e Minister, kier mira cu tin transparencia riba e recibo y esaki kiermen cu BBO/BAZV y BAVP mester aparece riba e recibo pa tur hende por wak e total cu ta cobra pa benta di servicio y producto hunto cu e impuesto.

Kitando e impuestonan aki for di e recibo ta trece desconfiansa y ta haci cu Aruba lo mustra mas caro en particular pa e turista. Tampoco por sa cuanto a hisa e prijs pa cubri gasto di BBO/BAZV y BAVP.

E impacto ta afecta turismo y imagen di Aruba y lo crea e impresion cu costo di bida na Aruba ta mas halto. Tanto local como turista ta indica esaki caba. E impuestonan y primanan social cu a subi recientemente a disminui e poder di compra y haci bida na Aruba mas caro.

Den esaki mester aclarea tambe cu despues di keda insisti hopi cu gobierno pa no implementa e propuesta di sconde BBO den e prijs, Gobierno a bin cu un otro propuesta pa extende e periodo di implementacion cu 3 luna.

Mester keda bon cla si cu e meta final cu e gremionan kier logra ta keda cu BBO/BAZV y BAVP mester keda aparece riba recibo. Hasta e proximo fase fiscal a keda anuncia y den consulta cu gremionan.

Comerciantenan no ta di acuerdo y ta malcontento cu e propuesta di ley nobo di impuesto di december, pasobra e no ta duna transparencia y e consumidor lo bay cuestiona e prijsnan.

Encuanto e decision, den un reunion cu Gobierno, KvK a conseha Gobierno caba pa semper busca conseho di esnan cu ta wordo afecta y asina yega na trece solucionnan practico y transparente pa pueblo y e sector priva por carga.

- Advertisement -

DUNA COMENTARIO

Please enter your comment!
Please enter your name here