ORANJESTAD (AAN) – Asociadonan y miembronan di management a bini hunto pa e lanzamento anual di e 100+ Days of Hospitality na La Cabana Beach Resort & Casino. Pa 2019, e tradicional 100 Days of Hospitality a wordo amplia y a cambia di nomber pa 100+ Days of Hospitality, pa asina por inclui e ‘shoulder season’.
“E ta un twist nobo cu nos a introduci den e mezcla”, Joe Najjar, General Manager, a splica, “ora cu nos a dicidi di expande nos campaña anual di hospitalidad pa por inclui e lunanan di zomer vakantie te cu herfst”.
Najjar a cuminsa e programa di e reunion general di asociadonan pa e di dos kwartaal dunando un caluroso bon bini na tur presente y asina duna e inicio oficial di e campaña.
Tambe e la duna un update cortico pero detaya tocante e standing di Medalia, y a encurasha e empleadonan pa sigui duna servicio excepcional y pa contribui di curazon na crea vacacionnan memorabel pa e huespednan di e hotel.
Assistant General Manager, Jessica Franken, a continua cu e introduccion di algun Standard Operating Procedures, SOPs nobo, y a splica kiko pa bisa e huespednan y con pa pone nan sinti realmente bon bini.
E la duna e ekipo conseho y sugerencia pa cu nan responsabilidad comunitario pa yuda e huespednan sinti na cas y laga nan sa cu nan ta aprecia y bon atendi.
Sandra Campos, HR manager a sigui cu e topico di con pa involucra e huespednan y mehora nan experiencia na e hotel. Campos a sugeri algun manera con pa ta mas interacrivo y a conclui cu un acronimo facil pa corda: LE²A²D, cu ta nifica Listen, Empathize, Engage, Apologize, Act y D-Light.
E empleadonan tabata sumamente contento ora Najjar a informa nan na final di e reunion cu La Cabana Beach Resort & Casino a ricibi e ‘Outstanding Achievement Award’ pa e di tres aña consecutivo y tambe e ‘Most Improved Resort’ pa 2017 vs 2018, di BlueGreen Vacation Resorts Management, un logro considerabel cu no por a wordo logra sin e compromiso total di e empleadonan.
E reunion general di e dos kwartaal a finalisa cu un rifa cu diferente premio y un bunita potret di e grupo.
E team di Eagle a wordo gradici, e departamento di Recurso Humano y Food & Beverage tambe pa organisa e evento tan gusta.
Pabien na e ekipo completo pa un bon trabao.
