Home General LMA: e ley colonial cu a bira arma politico cu gasto politico...

LMA: e ley colonial cu a bira arma politico cu gasto politico pa pueblo

112
0
SHARE
- Advertisement -

Analisis

Un di e problemanan grandi di politica ta, cu politiconan mester di voto.  Uno di e resultadonan ta, cu ningun hende kier a lanta para ora futuro di Aruba a wordo destrui cu e decision politico pa baha BBO cu mita, introduci un proyecto di refineria cu Nicolas Maduro di mal reputacion, y regala mas cu 1 Biyon di placa di pueblo na proyectonan PPS cu a wordo tapa pa e bandera di “Bo Aruba” cu awor ta den man di Husticia di nos Aruba.

Con cu mira e asunto, mientras politiconan mester di voto den un sistema cu ta hunga cu pueblo, nos ta sigui topa cu e tipo di desastre aki.

Un prueba grandi di e abuso politico cu ta wordo haci contra pueblo, ta e mal uzo di un ley colonial. Ta trata aki di e ley cu ta atende cu pago y otro compensacionnan di e personanan cu ta traha den servicio di Gobierno, cu no tin placa y mester uza placa di belasting di pueblo pa garantisa cu nan no ta perde voto.

Den un tempo cu continuamente ta tende di accion contra “colonialismo”. politiconan cu mester defende bienestar di pueblo, no ta bini cu proposicionnan pa atende cu uno di e problemanan mas grandi cu Aruba conoce, cu ta e Landsverordening Materieel Amtenarenrecht, cu ta regla e derechonan di ambtenaar.

Pakico ta papia di colonialismo? LMA, manera ta yama e ley cariñosamente, a nace den un tempo colonial. LMA ta basa riba areglonan cu Reino, despues Antia Hulandes, for di 1986 Aruba, a mantene bibo pa trahadonan di Gobierno.

LMA a nace den e necesidad di Reino Hulandes pa paga su empleadonan cu tabata bay traha na su colonianan y percura tambe pa nan cuido medico, etc.

LMA tin su reis, den areglonan cu mester a tuma pa e empleado publico Hulandes por a biaha pa Caribe pa traha na e colonia Hulandes den Caribe. Nan mester a biaha cu barco, keda hopi tempo sin contacto cu nan famia, pa despues bolbe nan pais caminda nan bida mester a sigui.

LMA pues ta e contracto colonial di Reino Hulandes, cu tabata inclui un tempo e derecho pa tur ambtenaar biaha cada seis aña pa Hulanda cu barco y pasa un tempo cu nan famia.

Despues di basta tempo, Antia Hulandes a dicidi di scrap e parti di ley cu tur ambtenaar ta haya seis luna di vacacion pa nan bay explora Europa. Pero mayoria di areglo a keda na vigor ora Antia Hulandes a keda encarga cu trahadonan di Gobierno Central y Gobierno Insular cu trahadonan den servicio di Teritorio Insular.

Importante ta pa mira, con e tempo salario tabata den “loonschalen” , cu tabata exigi base di estudio pa personanan cu wordo nombra den un puesto. Tabata topa cu cursonan di Adjunct Commies, Commies, etc. cu empleadonan di gobierno mester a sigui.

Ora politica a wordo poni den man di partidonan Antiano y Arubano, traha na Gobierno a bira un forma pa haya voto den demasiado caso. Nos no ta generalisa pero tur hende sa cu personanan cu no por a haya cierto rango den sector priva, tabata haya nombramento politico den gobierno.

Awe e LMA a bira un CAO di trahadonan di Gobierno cu exigencia cu sector priva no por honra pero politiconan si por honra pasobra e placa no ta di nan.

Ta increibel cuanto empleado publico tin. Pero si Gobierno pone e cantidad di empleado publico honra e demanda pa trabou, problema a cuminsa.

Si trahadonan di un tienda canta welga, no ta problema. Nan asunto cu nan compania doño di trabou.

Pero si ambtenaarnan welga, gobierno por cay y ta perde voto. Y gobierno mester di voto pa e ta gobierno.

Ken ta e gran perdedo? E parti di pueblo cu no ta traha na Gobierno pero ta paga belasting pa asina cubri tur gasto di personal.

Pakico no ta atende cu e ley colonial aki? Pasobra politico mester di voto. Cada ambtenaar contento ta un voto sigura.

Pues Aruba lo sigui honra un ley colonial cu ta contra interes di Aruba. Pero Aruba ta lomba contra muraya pasobra riba tur ley tin e ley politico: “No pone voto na peliger”.

- Advertisement -

DUNA COMENTARIO

Please enter your comment!
Please enter your name here