Home Enseñanza Mester bolbe na sistema di school habri merdia

Mester bolbe na sistema di school habri merdia

170
0
SHARE
- Advertisement -

Mas tempo pa educacion y espacio pa trabou pa mayornan

*Na bienestar directo di e mucha y comunidad moderno

*Mester yega na oranan nobo di trabou di mayornan

ORANJESTAD(AAN)–Kico e realidad nobo di comunidad ta rekeri pa enseñansa? Esaki tabata base di un investigacion cu DIARIO a conduci den cuadro di desaroyonan actual. Na prome luga ta bini dilanti cu e sistema di educacion actual ta laga espacio pa mehoransa di e nivel y expansion di e pakete cu e mucha ta ricibi na school.

Ademas mester introduci un sistema den cual tur mucha por haya desaroyo segun nan capacidad y talento sin mester tene cuenta cu e placa cu nan mayor tin. Pa por yega na e miho sistema, mester yega na introduccion di mas posibilidad di orario pa e trahado.

Un di e prome aspectonan cu ta topa den enseñansa, ta e pensamento di publico cu mester amplia e conocemento basico cu un mucha ta ricibi na school. Ta existi e pensamento cu antes muchanan tabata haya un miho preparacion pa por funciona den comunidad.

E sistemanan nobo di duna les a cambia y ta laga hopi na muchanan mes of nan mayornan pa produci ora nan bay cas. E opinion den hopi caso ta, cu enseñansa a bira mas facil pero tambe di calidad mas abou pasobra a scrap e pakete cu un mucha tabata ricibi na school.

E sistema di enseñansa actual ta wordo considera discriminatorio loke no mester ta e caso, si educacion ta e centro di funcionamento di comunidad. Mayornan cu por paga pa nan muchanan haya les priva merdia, ta keda cu un adelanto riba mayornan cu no tin placa pa paga pa cantidad di les cu ta resultado di e pakete di enseñansa di mucha na school.

“E ta un circulo vicioso,” segun cierto grupo cu ta di opinion cu e nivel di enseñansa a cay debi na e contenido di enseñansa,  cu mester produci maestronan tambe. Mas limita e formacion di maestro ta, mas limita formacion di e mucha lo ta,” a trece dilanti na DIARIO.

Cu mas tempo pa les na school, tin mas tempo pa splica mucha loke e ta siña. Actualmente muchanan mester bay sigui traha na cas riba loke a siña na school den menos tempo.

Segun informacion, mayornan ta consciente cu tin basta maestro cu ta duna “bijles” pafo di oranan di school. Esaki ta duna un entrada di parti di mayornan cu tin placa pa haci. Muchanan di mayornan pober no tin e placa pa nan yiunan ricibi educacion manera otro mucha den nan klas.

E pais ta paga maestronan pa educa muchanan y no por tin un diferencia den e resultado pasobra tin les priva pafo di e edificio di school.

Un punto esencial ta, cu mester cuminsa papia di e oranan di trabou di mayornan. Si amplia e cantidad di ora cu e mucha ta pasa na school, e mayor por traha te atardi.

E ta importante pa e bida familiar pasobra e parti di famia cu ta traha di 7.30or pa 3,00or, por bay busca nan yiunan na school y na cas comparti e bida familiar den cual no tin e peso cu e mayor mester yuda e mucha traha les hopi bes fastioso pa e mayor mes. Esaki ta haci posibel pa na cas, e mucha haya otro educacion basico basa riba e balornan familiar.

“Nos tempo moderno a demostra un distancia entre mayor y mucha. E cantidad di problema cu tin den famia mester haya solucion den posibilidad pa mas interaccion familiar den un circulo di siguridad. Bida di famia pa su mes ta brinda proteccion na tur miembro. Tambe na e muchanan y hobennan,” a wordo treci dilanti.

Na e momento aki muchanan ta bay cas cu cantidad di tarea di school y tempo pa bida familiar ta wordo limita si tene cuenta cu otro parti di educacion di mucha cu no ta na school.

E mucha mester haya espacio pa desaroya su talentonan riba diferente tereno loke ta resulta den mas creatividad.
Un parti grandi di comunidad di Aruba ta honra e pensamento di cambia orario di school. DIARIO lo sigui atende e topico aki pa entrega pensamento di pueblo na gobernantenan cu ta encarga cu ehecucion di un enseñansa dirigi riba lo miho pa Aruba.

- Advertisement -

DUNA COMENTARIO

Please enter your comment!
Please enter your name here