Home Editorial Mester scrap Citgo pa Aruba por bolbe na normalidad

Mester scrap Citgo pa Aruba por bolbe na normalidad

171
0
SHARE
- Advertisement -

Editorial 

For di momento cu DIARIO a cuminsa informa Aruba riba e berdad di Citgo y a presenta cu prueba e resultadonan sumamente negativo di e proyecto pa Aruba,  nos a asumi e posicion cu Aruba mester a pone un fin na un proyecto cu no por a wordo realisa y cuminsa atende cu posibilidad concreto pa por soluciona situacion economico di e pais.

DIARIO a bira e fuente di noticia importante riba Citgo y a hiba e pais na e momento cu pueblo a stop di kere den un mundo di fantasia y a habri wowo pa e realidad.

Te awor, sinembargo, ta atende Citgo ainda como un opcion y no ta tuma pasonan firme cu ta necesario pa sigura bienestar di Aruba. Parti di e pasonan aki mester ta, cu ta scrap Citgo for di panorama economico di e pais y ta tuma e accion necesario pa salvaguardia interes di e pais.

Nos ta bolbe mustra riba e parti mas importante cu ta na wega actualmente pa Aruba, cu ta e suministro local di gasolin y combustibel pa avionnan y barconan. Nos ta bolbe referi na e loke ta central pa funcionamento di nos economia y mester di solucion awor.

Aruba por confia riba palabracionnan cu el a haci cu Citgo? No! Punto. Ni ayera ni awe Aruba mester a confia un acuerdo sin proteccion necesario pa Aruba  manera prueba tras di prueba a demostra.

Nos por conclui, cu ningun momento mester a firma e acuerdo di Citgo cu tabata tin 90 porciento chens di fracasa y 10 (podise) di por wordo realisa.

A base di cual recomendacion di expertonan internacional gobierno anterior a firma e acuerdo, ta keda semper un pregunta grandi. Uno di e miles di pregunta cu pueblo ta haci su mes ariba henter e asunto di negociacion y acuerdo cu un regimen di mal reputacion riba tur tereno na nivel internacional.

E cuadro legal di gobernacion di Aruba ta brinda formanan cu ainda por determina kico a pasa cu Citgo. Investigacion lo mester wordo haci y e berdad un dia lo sali na cla pasobra nada ta keda scondi pa semper.

Loke Aruba na prome luga mester actualmente ta, siguridad. Aruba mester bolbe cana sin e peso di incertidumbre cu a destrui e pais durante ultimo añanan.

E daño cu e proyecto a haci na Aruba ta sigui crece mientras Aruba no yega na un decision pa su futuro den cual obviamente no por tin luga ni pa Citgo.

E comision cu ta sondea posibilidad cu futuro tin pa e refineria, por sigui haci su trabou. Sinembargo, banda di e comision aki mester bini un grupo di experto legal cu por saca Aruba for di e union destructor pa nos economia cu ta loke e acuerdo cu Citgo ta representa.

En corto, mester pone un fin na e proyecto Citgo y saca Aruba for di e fantasia cu a afecta nos situacion financiero y a haci hopi daño na nos pais.

Unabes nos dicidi kico nos ta haci, nos ta dal e siguiente stap. Ta cuminsa atende cu urgencia e fase transitorio di awe pa e momento cu nos tin siguridad di loke mester pasa den futuro.

Ningun persona, compania of pais por sigui cana den e puzzel di Citgo sin haci su mes daño serio.

Nos informacionnan riba Citgo a demostra di tabata berdad. Ta a base di e berdadnan cu nos a propaga, awe nos ta urgi Aruba pa kap cu e proyecto y encamina e proceso di terminacion cu un compania cu cada dia lo hiba Aruba mas atras.

 

 

- Advertisement -

DUNA COMENTARIO

Please enter your comment!
Please enter your name here