Home Gobierno Minister Andin Bikker a otorga OC dos bus y un pickup completamente...

Minister Andin Bikker a otorga OC dos bus y un pickup completamente nobo

61
0
SHARE
- Advertisement -

ORANJESTAD (AAN)—Minister di Husticia mr. Andin Bikker, a bishita e Centro Ortopedagogico situa na Dakota, pa haci entrega di dos bus y un pickup completamente nobo, pa asina cubri un necesidad di e centro pa transportacion di su hobennan residente. Ademas, nan a inaugura e uniform nobo.

E dignatario a menciona cu OC a haya e grato noticia cu Diahuebs, dos di e hobennan residente a caba scol y a slaag. Minister Bikker a expresa cu nan ta hopi contento y orguyoso di e dos hobennan aki. E mandatario a expresa palabranan di pabien, deseonan di exito y sabiduria pa e formacion cu nan tin den OC.

E mandatario a anuncia cu den e proximo simannan lo tin instalacion di e computernan nobo na OC y diferente material mas.

Minister Bikker a reitera cu e meta primordial di Gabinete Wever-Croes ta pa e ser humano ta central, y den e cuadro aki e ta provee personal y institutonan tur e material necesario cu nan mester, y den e proceso aki nan ta sumamente orguyoso di wak tambe cu e hobennan residente, pa kendenan e trabao ta wordo haci, ta beneficia di esaki.

Director di OC Dynia Abath- Muller tambe a hiba palabra expresando cu e personal ta contento pasobra a estrena nan uniform cu pa basta tempo nan tabata warda riba nan, y ademas pasobra nan a batiza e dos busnan y e pick up cu ta sumamente necesario pa e transporte di e hobennan residente den OC.

E dama a splica cu tur dia nan tin cu bay scol, tin actividad pa asisti, bishita na cas, entre otro actividadnan den nan tempo liber.

Semper e personal y material ta hopi necesario y importante pa nan tin, ora ta trata un Centro Ortopedagogico manera esaki, pasobra si no tey e trabao ta stagna.

Pesey nan ta sumamente gradici cu e logronan aki cu nan por bisa cu awor nan ta completo. El a expresa palabranan di danki den nomber di e hobennan, na prome lugar, y di e personal.

Tambe e tabata tin palabranan di pabien pa e dos graduadonan, e personal y specialmente e mentornan cu a sostene e hobennan aki den nan estudio, pasobra e diploma den nan man tambe lo habri caminda pa nan den futuro.

- Advertisement -

DUNA COMENTARIO

Please enter your comment!
Please enter your name here