Home Hudicial Ministerio Publico a apela sentencia unda a declara liber tur cuater sospechoso...

Ministerio Publico a apela sentencia unda a declara liber tur cuater sospechoso di 110 kilo di cocaina

382
0
SHARE
- Advertisement -

Awor ta tres Hues di Corte Superior lo bay trata e caso

ORANJESTAD (AAN): Loke tabata di spera a sosode. Ministerio Publico no a keda nada contento cu Hues a declara tur e cuater sospechosonan A.C., R.Z., K.W. y G.R. liber di e 110 kilo di cocaina cu a haya na cas di A.C. Ministerio Publico a apela e sentencia y awor ta tres Hues di Corte Superior (Hof) ta bay trata e caso.

   EXIGENCIA DI FISCAL:

Na Maart 2019, Fiscal a bisa Hues cu e ta haya legalmente proba cu dia 19 Mei 2018 e grupo A.C., R.Z., K.W. y G.R. a importa 110 kilo di cocaina y Polis a haya e droga na cas di A.C. na Casibari.

E droga tin un balor di mas cu mey miyon Dollar. E droganan tabata den dos icejug color blanco. E icejugs tabata ariba e boto cu a yega na e beach dilanti cas di Gobernador. Fiscal ta haya cu tabatin henter un organizacion pa trece e boto riba tera y hiba Casibari.

A haya un iPhone blanco na e cas cu un cantidad di informacion hopi importante. E smartphone aki tabata di un tal Angelo cu tabata den contacto cu G.R.

For di mensahenan di Whatsapp a ripara cu for Januari 2019 tabatin contacto. E mensahenan tabata mustra bon cla con e importacion di 19 Mei 2018 mester a sosode.

   EXIGI CASTIGO:

Na opinion di Fiscal, si mira e cantidad di 110 kilo di cocaina, un gran parti lo worde exporta. Droga ta causa un cantidad di criminalidad.

Droga ta veneno pa comunidad. Fiscal a bisa cu G.R. y A.C. tabatin funcion organisatorio y a exigi 7 aña di prison pa cada un. Pa R.Z., kende recien tabata castiga pa droga, Fiscal a exigi 7 aña di prison y pa K.W. 5 aña di prison.

    SENTENCIA:

Na April 2019 tabatin e sentencia caminda Hues a bisa cu e ta rechaza peticion di abogadonan pa declara Fiscal no admisibel. Hues a mustra cu ta den masha poco caso Corte Supremo ta bay di acuerdo.

Hues no ta haya suficiente argumenta di parti abogadonan pa por declara Fiscal no admisibel. Na opinion di Hues, no a sali na cla cu durante investigacion Fiscal a viola norma.

    FALTA MAS PRUEBA:

Hues a mustra cu for di e documentonan mester saca afor si e droga haya na cas di A.C. na Casibari ta procedente di e boto di pisca chikito cu a yega na e beach banda di cas di Gobernador.

E tata di A.C. a bisa cu un jeep a busca e boto chikito mas o menos 6’or di mainta. Hues a remarca cu no tin imagen di camera y tampoco tin informacion di radar cu e boto a sali for di awanan territorial di Aruba y tampoco cu un boto a trece cos pa e boto.

E distancia entre Aruba y Venezuela ta hopi y pa e boto a bay busca e droga den un periodo di 3 ora, esey no por. Hues a mustra cu for di e camera di seguridad di un restaurant, por mira cu un boto a yega na e beach cu dos icejug grandi color blanco. Hues a bisa cu e pregunta ta, si e icejugnan aki tabata contene droga y si ta eseynan a worde haya na e cas na Casibari. Na e cas a haya 3 icejug. Un ta grandi y un mediano y un blauw.

   FAYO DEN INVESTIGACION:

Hues ta haya cu no tin prueba cu e icejugnan cu a haya na cas di A.C. ta esnan cu tabata den e boto di pisca. Ta parce cu promer cu e boto a yega na cas di A.C. tabatin dos icejug blanco grandi.

Hues ta haya cu Polis no a laga haci investigacion si e verf cu tabatin den boto ta esun cu tin na e icejugnan. Tampoco no a haci investigacion cu cacho anti droga pa mira si tabatin droga riba e boto. Na opinion di Hues, no tin prueba cu e dos icejug riba e boto tabatin droga.

Door cu e razia na Casibari a tuma lugar mas o menos 12.30, Hues ta haya cu e tres personanan riba e boto por a bay cu e icejugnan. Hues ta haya straño cu tres dia despues di e razia, a confisca e boto. Polis no a saca potret con e boto tabata, kico ta mira den e boto. Hues a bisa cu segun Fiscal e yamadanan whatsapp, G.R. ta admiti di a haci tur cos pero Hues a scucha tur e combersacion y whatsapp y e no ta haya cu ta papia di transportacion di cocaina.

Hues a remarca cu pa bay interpreta un combersacion y bisa cu ta relacion cu importacion di droga no ta suficiente. E combersacionnan di whatsapp mester ta acompaña cu pruebanan.

Den e caso aki no tin prueba cu e boto tabatin droga. Hues a mustra cu G.R. dia 12 November 2018 durante interogacion a desmenti diferente biaha. Full na final di e interogacion, Polis a haci un resumen di nan sospechonan.

Segun e resumen, G.R. a haci preparacion na Mei 2018 pa importacion di droga y 30 kilo ta pa G.R. y e resto pa A.C. Hues ta haya cu Polis no a sigui investiga mas riba declaracion di G.R., pa sa con e droga a drenta y unda e droga ta awor. Polis a djis bay tras di loke G.R. a bisa. Hues ta haya e declaracion G.R. no suficiente pa bisa cu G.R. ta admiti tur cos.

   TUR SOSPECHOSO DECLARA LIBER:

Hues a conclui cu no por proba cu A.C. tabata sa di e droga y no por prueba cu e boto tabatin droga abordo. Hues a declara tur cuater sospechoso liber. El a condena K.W. pa incubrimento di aparato di DJ na 100 dia di prison, cual el a sinta caba. Fiscal no a keda nada contento.

   APELA SENTENCIA:

DIARIO por a compronde cu Ministerio Publico a apela e sentencia y awor ta Corte Superior lo bay trata e caso. Posiblemente e aña aki mes e tratamento lo por tuma lugar.

- Advertisement -

DUNA COMENTARIO

Please enter your comment!
Please enter your name here