Home Hudicial No tin suficiente prueba: Pastor S. declara liber di a mishi...

No tin suficiente prueba: Pastor S. declara liber di a mishi cu un mucha

265
0
SHARE
- Advertisement -

ORANJESTAD (AAN): Manera DIARIO a publica, Diahuebs mainta Hues di Corte den Promer Instancia a dicta sentencia den e caso penal cu Ministerio Publico a cuminsa contra e pastor S. Hues a bisa cu den casonan di inmoralidad mester haya prueba di sosten pasobra ta solamente tin declaracion di e victima contra e declaracion di e sospechoso.

Hues ta haya cu no tin suficiente prueba y ta declara pastor S. liber. E mama di e mucha y familiar tabata presente den sala di Corte.

Na luna di Mei 2019, tratamento di e caso a tuma lugar caminda Fiscal a acusa S. cu na November 2016, intencionalmente el a mishi cu un mucha muher di 10 aña na su pecho. Pastor S. ta desmenti di a haci esaki.

Hues a mustra cu e mucha a bisa cu e tabata mirando television su so den e camber di wak television y e pastor a puntr’e si e kier un deken. E pastor a hiba un deken p’e y despues e pastor a cuminsa kishiki’e y na dado momento a mishi na su pecho y bay.

Hues a bisa cu e ta haya hopi straño cu Polis no a scucha e leidsternan na e scol y otro personanan pa haya sa si berdad e mucha tabata su so y si e sospechoso a bay den e cuarto ora e mucha tabata eyden.

  EXIGENCIA DI FISCAL:

Fiscal a bisa cu segun ley penal, a base di un testigo no por condena un persona. Den un caso inmoral mester tin prueba di sosten. E prueba ta basa riba declaracion di e mucha. Tambe tin cu tanto e tata como mama a mira e mucha tristo. E mucha na yoramento a conta su mama y e mama a grab’e.

Na opinion di Fiscal, e declaracion di e mucha ta haya sosten a base di e hecho cu S. a bisa cu e sa kishiki e mucha y cu tur dia e ta drenta den e camber di television. E mucha a bisa cu e tabata su so den e camber y cu S. a bay cerca dje. Fiscal ta haya cu tin suficiente prueba.

Fiscal a bisa cu un traimerdia mester ta un lugar sigur y mayornan mester por confia cu nan yiu ta den bon man. Como pastor, S. mester tin hopi moral.

Fiscal ta haya cu S. a mal usa e confianza cu e mayornan y e mucha tabatin den dje. A tracha integridad di e mucha. Fiscal a tene cuenta cu hopi tempo a pasa promer cu e caso a bin dilanti. El a exigi 140 ora di trabao of 70 dia di prison. Tambe Fiscal a exigi 4 luna di prison condicional cu 2 aña di prueba.

    SENTENCIA:

Diahuebs mainta Hues a bisa e sospechoso S. cu den e caso aki tin declaracion di e mucha, kende ta bisa cu S. a mishi cu su pecho y e declaracion di S. cu ta desmenti esaki.

Hues a bisa cu den casonan di inmoralidad mester tin prueba di sosten. Tin declaracion di e mama y e tata, kendenan ta bisa loke e mucha a bisa nan. Hues a mustra cu e declaracion di e mama y e tata no ta suficiente como prueba di sosten pasobra nan ta bin di e mesun fuente, esta e mucha.

Hues a sigui bisa cu esey ta haci cu a base di ley no tin suficiente prueba cu S. a mishi cu e mucha y no ta keda otro cu mester declara S. liber. Hues a bisa cu e no ta haya legalmente prueba cu S. a mishi cu e mucha y ta declara S. liber.

Den Corte riba Diahuebs mainta, por a ripara cu e mama y e familiarnan no a keda contento cu e sentencia.

- Advertisement -

DUNA COMENTARIO

Please enter your comment!
Please enter your name here