Home Gobierno Pa fin di Juni aki e prome busnan nobo pa Arubus lo...

Pa fin di Juni aki e prome busnan nobo pa Arubus lo ta na Aruba

7
0
SHARE
- Advertisement -

“Un era nobo ta cuminza pa Arubus”

ORANJESTAD (AAN) – Dialuna mainta Gobierno a tene su prome rueda di prensa di e siman, den cual Minister di Transporte, Comunicacion y Sector Primario sr. Chris Romero a duna informacion, y como central a referi na e yegada di e prome siete pa ocho unidadnan pa Arubus, na fin di Juni awor.

E dignatario a reitera tocante su viahe reciente pa Sao Paulo, Brasil, hunto cu su consehero y e director di Arubus, unda a bishita e compania cu ta produci e busnan.

Prome cu sigui elabora tocante e viahe di trabao aki, e mandatario a papia tocante e nombramento di e director nobo pa Arubus, cu a tuma lugar despues di un proceso largo.

Esaki a sosode despues cu un compania di consulta di exterior a tuma e solicitudnan unda a scoge sr. Edwin Mohamed como director di Arubus.

Minister Romero a comenta cu sr. Mohamed a bin for di e raad anterior di gobierno unda ultimo tempo e tabata presidente, y no ta cu el a wordo nombra asina sin mas.

El a resulta e persona adecua pa bin cu un era nobo pa Arubus.

Siguiendo cu e viahe na Sao Paulo, e dignatario a bishita e fabrica di e busnan Mascarello y MAN Volkswagen. El a splica cu e curpa di e busnan ta di Mascarello.

E mandatario a menciona cu e bishita aki tabata sumamente importante, pasobra Arubus ta bay drenta den un etapa nobo unda cu e compania lo conoce cambionan grandi.

Esaki no ta encera solamente un flota nobo pero mehoracion di e servicio di Arubus pa nos comunidad, y cu e busnan ta na ora pa esnan cu ta depende di e transporte publico aki.

E dignatario a duna di conoce cu pa fin di Juni aki, siete of ocho bus nobo lo yega Aruba y pa fin di Juli e otronan ta yega pa un total di 15 den e prome etapa. Minister Romero a indica cu gobierno ta bay purba pa e aña aki mes Arubus haya 30 bus nobo.

E mandatario a subraya cu esaki a tuma un inversion grandi y esaki a tuma tempo pa haci e cosnan bon y bin cu e busnan adecua, y pa brinda bon servicio.

E busnan ta bin cu sistema pa wifi cu ta bay ta gratuito. Tur e prome 15 ta bin cu airco y e busnan ta bin cu facilidad pa pasaheronan cu ta riba rolstoel.

Minister Chris Romero a señala cu awendia tecnologia ta sumamente importante, y pesey e ta spera cu e wifi den bus lo capta mas interes di e pasaheronan pa haci uso di Arubus.

El a agrega cu e intencion ta pa cambia e flota completo standardiza. Esaki ta nifica bin cu un tipo di bus. Ta zorg tambe pa e auto parts local tin e piezanan cu e busnan aki mester, pa ora tin mester no tin cu warda lunanan largo pa haya pieza.

Pesey tambe a bishita e companianan concerni, pa asina crea un relacion pa nan brinda e tecniconan e conocementonan pa traha riba e busnan y duna nan mantenimento.

- Advertisement -

DUNA COMENTARIO

Please enter your comment!
Please enter your name here