Home General PDVSA a hiba Guaidó Corte pa autoridad Citgo

PDVSA a hiba Guaidó Corte pa autoridad Citgo

223
0
SHARE
- Advertisement -

Loke a spera cu Maduro lo a haci na Februari a bira realidad

*Peticion na momento cu mas informacion criminal PDVSA ta drenta

*Merca ta reconoce Guaidó como representante oficial di Venezuela 

ORANJESTAD(AAN)– Rusia no ta papia y bisa nada di su parti den Citgo. E grupo di financiado cu tin e mayoria di Citgo como nan borg, ta keda keto. Mientras ta insigur si Citgo lo termina 2019 como propiedad di Merca, awor grupo Maduro a dicidi di cuminsa un caso den Corte na Delaware, Merca, pa exigi Guaidó entrega mando di Citgo.

Loke ayera a bira noticia, a yega poco laat. Dia 22 di februari, ora Guaidó a tuma mando di Citgo y a pone su gerencia pa dirigi e empresa estatal di Venezuela na Merca, DIARIO a mustra cu probablemente Maduro lo a cuminsa un caso contra Guaidó.

Ora na April e gerencia di Citgo nombra pa Guaidó a haya e placa pa paga e interes riba e debe enorme cu Maduro a haci cu Citgo como borg y asina a evita cu e inversionistanan Mericano lo a exigi e mayoria di Citgo, Maduro no tabata contento y a papia di ladronicia di placa di Citgo pa paga e debe.

Na juni a wordo anuncia cu PDVSA ta muda bay Rusia. No ta conoci si ta mudansa di PDVSA pa Rusia a bira e motibo, pero Diamars e dirigente di PDVSA a entrega un caso contra e Presidente di Citgo nombra dor di Guaidó den Corte na Merca.

Rudolfo Enrique Jimenez a entrega un caso contra Luisa Palacios na Court of Chancery na Delaware, Merca.

Jimenez ta mustra cu na e momentonan aki diferente persona kier tuma autoridad riba subsidiario di PDVSA cu ta den un crisis.

Sinembargo e kier pa Hues na Merca reconoce e grupo Maduro como representante legitimo di PDVSA y tur subsidiario.

For di Februari, DIARIO a indica cu pa Merca e autoridad riba companianan di estado di Venezuela ta Guaidó, cu ta e persona cu Merca ta reconoce como Presidente di Venezuela segun Constitucion Mericano.

Lo ta basta dificil pa Hues bay contra Constitucion Mericano den e caso aki, manera vocero di Citgo mes a trece dilanti.

E problema ta surgi na momento cu na Merca, Ivan Simoniviz cu den pasado tabata fungi como dirigente policial, a presenta den publico despues di a logra bandona Venezuela.

El a mustra cu e hecho cu el a haya yudansa interno di gruponan cu ta sostene Maduro ta prueba, cu e fin di Maduro ta cerca.

El a logra subi un avion y bandona e pais pa bay Merca, caminda awor e ta presenta informacionnan riba casonan criminal cu a tuma luga den seno di PDVSA.

Casonan di corupcion pero tambe di traficacion di droga cu ayudo di dirigentenan terorista, ta acusacionnan cu e ta presenta na Merca.

Ademas e lo duna informacion importante cu el a ricibi di miembronan di e grupo Maduro cu a asisti den su salida for di Venezuela pa awor yuda yega na detencion di un grupo considerabel di participantenan den actonan criminal.

Ayera tardi tabata tin tur indicacion cu e situacion na Venezuela ta drenta un fase nobo.

- Advertisement -

DUNA COMENTARIO

Please enter your comment!
Please enter your name here