Home Gobierno Premier Evelyn Wever-Croes convenci cu protocol entre Aruba y Hulanda ta duna...

Premier Evelyn Wever-Croes convenci cu protocol entre Aruba y Hulanda ta duna stabilidad y confianza

167
0
SHARE
- Advertisement -

ORANJESTAD (AAN): Parlamento di Aruba awe ta trata e cambionan den ley di LAft. E cambionan ta basicamente dos, maske cu Gobierno kier a haci mas cambio, pero a dicidi di laga eseynan pa momento di introduci e propio Begrotingskamer.

Den e cambio aki Gobierno ta propone e normanan di deficit y surplus nobo, y ta regla e nombracion di ex-politiconan den e college.

   HERENCIA FINANCIERO DEPLORABEL:

Despues cu Gabinete Wever-Croes 1 a sinta, tur hende a worde confronta cu e realidad financiero di nos pais. Deficit hopi mas halto cu premira, no cumplimento cu ‘deadline’ pa entrega presupuesto y cuenta anual y cantidad di recibo di e gobierno anterior cu tabata ‘pop up’ di sorpresa cu Gabinete Wever-Croes 1 mester a paga.

Institutonan di supervision no a cumpli cu nan tarea di supervisa y gremionan cu mester tabata critico, tabata keto mientras e gobierno anterior a hiba Aruba na borde di bancarota.

Locual tabata peor ta cu e normanan poni den ley no a worde cumpli cu nan y no por a worde cumpli cu nan tampoco. Aparte di esaki tabata tin total desconfianza den Aruba. Tanto Hulanda como rating agencies no tabata tin confianza mas. E credibilidad di Aruba tabata na peliger.

   NORMANAN NOBO:

Gabinete Wever-Croes 1 a prepara un memorandum financiero economico cu ta stipula un caminda con pa saca Aruba for di e problemanan financiero.

A base di e memorandum aki a presenta un presupuesto pa 2019 den cual ta baha e deficit di 149 miyon Florin den 2018 pa 25 miyon Florin den 2019 y pa 2020 ta premira un surplus pa prome biaha  den hopi tempo. Den un reunion publico na september 2018 Parlamento a aproba e normanan aki den un mocion.

   PROTOCOL 2018:

A base di e memorandum financiero economico y e aprobacion di Parlamento, Minister President Evelyn Wever-Croes y Minister di Finansa Xiomara Ruiz-Maduro a bay negocia un protocol nobo cu Hulanda pa asina crea un base di confianza y pa evita un otro KB. Na november 2019 a yega na palabracion cu pa aña 2019 lo tin un deficit di maximo 0.5% di GDP, pa 2020 lo tin un surplus di minimo 0.5% di GDP y pa 2021 y despues lo tin un surplus di minimo 1% di GDP. Di e forma aki lo saca Aruba for di deficit y Aruba por cuminsa paga su debe back.

E protocol aki a trece back trankilidad den e relacion cu Hulanda. Tambe a pone e fundeshi pa e confianza por bolbe. Indudablemente lo no ta facil pa cumpli cu n’e, pero Gabinete Wever-Croes 1 lo cumpli cu n’e. No pa tene Hulanda contento sino pa Aruba mes.

   CAMBIO DI LEY:

E normanan aki mester worde cambia den ley y esey ta e cambio cu ta worde trata den Parlamento awe.

Dia gobierno di AVP a pasa e ley di LAft, na ultimo momento e Fraccion di AVP a pone un prohibicion cu ex politiconan no por forma parti di e CAft. Segun nan a bisa e tempo ey, pa asina Nilo Swaen ni Nel Oduber por bira miembro di CAft un dia. Sinembargo Gabinete Wever-Croes 1 ta di opinion cu nos no mester limita nos mes pasobra nos tin algun ex politico cu lo ta hopi bon pa ocupa un funcion den CAft. E parti di e cambio aki tambe ta inclui den e ley cu Parlamento ta trata awe.

RUMBO POSITIVO:

E protocol firma y e maneho financiero serio di Gabinete Wever-Croes 1 a cuminsa duna su frutonan positivo. IMF a publica un rapport positvo den cual ta demostra cu e confianza tey back atrobe den Aruba, debi na e maneho responsabel, firme y realistico pa atende cu finanzas.

Aruba a mantene tambe e rating di Fitch, cu casi a bay perdi debi na mal maneho di gobierno anterior. Ta danki na e vision nobo di Gabinete Wever-Croes 1 Aruba no a perde e rating. Y tin mas interes awor den Aruba pasobra tin un biento fresco, tin un gobierno nobo cu ta pone e ser humano central, y p’esey ta determina di pone finanzas publico na orden back. Awor tin un Minister di Finansa cu sa di e materia y ta tuma e decisionnan necesario cu caracter y firmesa, decisionnan necesario pa hiba Aruba padilanti.

    BEGROTINGSKAMER:

E protocol 2018 ta e base pa Aruba haya e autonomia financiero back, y e cambio di e Laft di awe ta e preparacion pa esaki. Segun e protocol en todo caso aki dos aña Aruba lo introduci su propio Begrotingskamer cu lo ta encarga cu e supervision financiero.

Preparacionnan ta andando caba pa asina e Begrotingskamer cuminsa funciona mas trempan pa asina aki dos aña por tuma over e tareanan di CAft sin problema.

“Poco poco pero sigur nos ta saca Aruba for di e abismo financiero cu nos a encontr’e na 2017. Pasobra nos ta pone e ser humano central y e ser humano no por desaroya cu un debe gigantesco asina. Nos ciudadanonan merece un miho calidad di bida y esey nos ta determina pa brinda nan”, segun Premier Evelyn Wever-Croes.

- Advertisement -

DUNA COMENTARIO

Please enter your comment!
Please enter your name here