ORANJESTAD (AAN)- Recientemente e seleccion nacional di landamento artistico di Aruba den diferente categoria a representa Aruba na Barbados.
Nan a competi na e “Central American and Caribbean Amateur Swimming Confederation Championships” conoci como CCCAN, un di e competencianan mas grandi pa e region di America Central y Caribe. E aña aki tabata tin participacion di Corsou, Panama, Guatemala, Jamaica, Barbados y Aruba.
E atletanan a sobresali durante e competencia y a regresa Aruba cu un total di 10 medaya di Oro y 3 medya di Brons y e titulo un biaha mas di “Overall Champion” den cada categoria pa CCCAN 2019!
Oro a bai pa e team routine di 12&U cu e ateletanan: Sofia Cardona, Silvana Cardona, Abizahi Sanchez, Alina Dirksz, Camila Tromp, Xiana Hoo y Amylene Helder.
Den e rutinanan di Free Solo, e medaya di Oro a bai pa Sofia Cardona den categoria 12&AU, pa Avigayle Tromp den categoria 13-15 y pa Meghan Tromp den categoria Junior Free.
Den categoria Junior Tech e medaya di Brons a bai pa Kainah Croes.
Den e rutinanan di Free Duet e medayanan di Oro a bai pa Abizahi Sanchez y Sofia Cardona(12AU), pa Mikayla Morales y Avigayle Tromp (13-15) y pa Meghan Tromp y Kainah Croes (Juniors).
Den e rutina Duet TEch Juniors tambe e atletanan Meghan y Kainah a gana medaya di Oro.
Den e evento di “Figures” Aruba tambe a sobresali cu un Oro y Brons den 12au pa Sofia Cardona y Abizahi Sanchez, den 13-15 un Oro pa Avigayle Tromp y un Brons pa Mikayla Morales.
Directiva y miembronan di Barracudas Aruba kier a felicita e atletanan cu e logronan di e competencia aki, un danki especial y palabra di elogio pa e coaches nan cu ta traha duro cu e atletanan.
